Þjóðverjar segja hins vegar að engin nauðgun hafi átt sér stað en rannsaka þó tvo menn fyrir barnaníð.
Rússneskumælandi íbúar Þýskalands og hægri aðgerðarsinnar mótmæltu á götum borga í Þýskalandi um síðustu helgi. Þá hafði sjónvarpsfrétt um málið birst í Rússlandi sem dreift var víða á samfélagsmiðlum.
Samkvæmt fréttinni var stúlkunni rænt úr skóla sínum af hælisleitendum. Henni var haldið í 30 tíma og nauðgað af þeim. Mótmælendur héldu á skiltum sem á stóð: „Við viljum öryggi“ og „Börnin okkar eru í hættu“.
Hægri öfgamenn hafa notað málið til að kasta olíu á þann eld sem málefni hælisleitenda eru í Þýskalandi í dag. BBC bendir á að rússneskir fánar sjáist oft á mótmælum gegn múslimum í Þýskalandi, eins og þegar Pegida samtökin haldi slík mótmæli.
Engin ummerki um nauðgun
Stúlkan sem heitir Lisa hvarf þann 11. janúar síðastliðinn en kom aftur heim til sín degi seinna. Hún hélt því fram að henni hefði verið rænt og að henni hefði verið nauðgað. Rannsókn sýndi þó ekki fram á ummerki um nauðgun né nokkurra kynferðislegra athafna og breytti stúlkan sögu sinni.
Lögreglan telur að hún hafi þó haft kynmök áður en hún hvarf og eru tveir menn nú undir rannsókn lögreglu. Þeir eru grunaðir um barnaníð.
Sergei Lavrov, utanríkisráðherra Rússlands, sakaði svo yfirvöld í Berlín og Þýskalandi um að hylma yfir málið í vikunni. Hann sagði að öllum ætti að vera ljóst að stúlkan hefði ekki horfið sjálfviljug í 30 klukkustundir.
„Ég vona að þessum vandamálum verði ekki sópað undir teppi og að atvik eins og atvik Lisu okkar muni ekki endurtaka sig,“ sagði Lavrov.
Frank Henkel, innanríkisráðherra Berlínar, sagði á blaðamannafundi í gær að það kæmi honum mjög á óvart að yfirvöld í Moskvu væru að skipta sér af lögreglumáli í Þýskalandi. Hann sagði lögreglu sem og saksóknara í Þýskalandi fara eftir lögum.
„Þær ásakanir að rannsakendur séu að hylma yfir eitthvað verða ekki réttar ef þær eru sagðar nógu oft.“ Samkvæmt BBC hafa aðrir stjórnmálamenn í Þýskalandi brugðist reiðir við ásökunum Rússa og saka yfirvöld þar um að kveikja undir hægri sinnuðum samsæriskenningum í Þýskalandi.
Mikil spenna er þegar í Þýskalandi vegna málefna hælisleitenda og þá sérstaklega eftir árásirnar í Köln á nýársnótt.
Frank-Walter Steinmeier, utanríkisráðherra Þýskalands, sagði ekkert tilefni vera til að beita áróðri sem þessum til að hafa áhrif á erfiða umræðu um málefni flóttamanna í Þýskalandi. Talsmaður Angelu Merkel, kanslara Þýskalands, sagði að yfirvöld ættu að geta rannsakað málið án þrýstings frá stjórnvöldum annars ríkis. Hann sagði að ekki ætti að nota þetta mál í stjórnmálalegum tilgangi.
Ríkisreknir fjölmiðlar í Rússlandi hafa áður verið sakaðir um að nota áróður til að ýta undir óróa með rússneskumælandi íbúa eystrasaltsríkjanna. BBC segir embættismenn óttast að sömu taktík gæti nú verið beitt í Þýskalandi, mögulega vegna viðskiptaþvingana ESB gegn Rússum vegna Úkraínudeilunnar.
