Vardy gæti spilað gegn Barcelona í kvöld

Það er áhugaverður leikur í International Champions Cup í kvöld er Englandsmeistarar Leicester City spila við Spánarmeistara Barcelona.

Leikur liðanna fer fram í Stokkhólmi. Fín upphitun hjá Leicester fyrir átökin í Meistaradeildinni í vetur.

Jamie Vardy gæti spilað sinn fyrsta leik fyrir Leicester í sumar en hann er að jafna sig eftir úlnliðsaðgerð.

„Við verðum að sjá til hvernig höndin lítur út þegar gifsið kemur af en vonandi get ég spilað einhverjar mínútur í þessum leik,“ sagði Vardy.

Leikurinn hefst klukkan 18.00 og er í beinni á Stöð 2 Sport 2.