Þessi fótbolastelpa æfir eins og sú sem ætlar að verða best í heimi | Myndband

Æfingamyndband með bandarískri fótboltastelpu hefur vakið þó nokkra athygli á netinu en þar fer hin sextán ára gamla Allie Winstanley algjörlega á kostum með boltann.

Allie Winstanley sem hefur leikið með FC Stars of Massachusetts unglingaliðinu undanfarin ár með góðum árangri en hún er á leiðinni í háskóla næsta haust og valdi það að spila með Dartmouth.

Þjálfararnir hjá Dartmouth ættu að geta sett upp afar krefjandi æfingar fyrir nýliða sinn enda er Allie Winstanley meira en hinn venjulegi leikmaður.

Fésbókarsíðan GPS Soccer Assassins er dugleg að setja inn fróðleg og skemmtileg myndbönd af knattspyrnufólki að gera allskyns þrautir og æfingar með boltann.

Myndband GPS Soccer Assassins með Allie Winstanley sýnir að þar fer fótbolastelpa sem æfir eins og sú sem ætlar að verða best í heimi.

Frábær fótboltavinna, hraði og snerpa sjá til þess að hún leysir æfinguna með starri prýði og þá sýnir stelpan að hún er sparkviss líka. Það verður gaman að sjá hvort hún komist ekki í bandaríska landsliðið á næstu árum.

Það er síðan svo sannarlega hægt að ráðleggja bæði ungum fótboltastelpum og fótboltastrákum að skoða myndbandið með Allie Winstanley hér fyrir neðan. Æfingin skapar auðvitað meistarann en þau sem eru til í að eyða tíma í aukaæfingarnar ættu að geta orðið betri í fótbolta og það fljótt.