Swansea býst við nýju tilboði frá Everton í Gylfa

Swansea City býst við að fá nýtt tilboð frá Everton í íslenska landsliðsmanninn Gylfa Þór Sigurðsson.

Samkvæmt frétt Daily Mail á Swansea von á tilboði upp á 32 milljónir punda í Gylfa. Swansea hefur þegar hafnað 27 milljóna punda tilboði Everton í íslenska landsliðsmanninn.

Gylfi átti frábært tímabil með Swansea í vetur og er eftirsóttur af öðrum liðum í ensku úrvalsdeildinni. Auk Everton hefur hann m.a. verið orðaður við Leicester City og Tottenham.

Everton hefur verið aðsópsmikið á leikmannamarkaðinum í sumar og keypt leikmenn fyrir tæplega 100 milljónir punda.

Everton á þó von á vænri summu frá Manchester United sem er væntanlega að fara að kaupa Romelu Lukaku á 75 milljónir punda.

Gylfi skoraði níu mörk og gaf 13 stoðsendingar í ensku úrvalsdeildinni á síðasta tímabili og átti stærstan þátt í því að Swansea hélt sæti sínu í deildinni.