Leikmenn Manchester United snéru leiknum við á 66 sekúndum og unnu riðilinn

Manchester United tryggði sér sigur í sínum riðli í Meistaradeildinni með 2-1 sigri á CSKA Moskvu á Old Trafford í kvöld. Untied lenti undir en skoraði tvö mörk með stuttu millibili í seinni hálfleik.

United menn þurftu eitt stig til að gulltryggja efsta sætið en liðið mátti líka tapa með fáum mörkum því markatala liðsins var svo hagstæð. United menn voru því ekkert mikið að stressa sig í kvöld.

CSKA Moskva komst í 1-0 á lokamínútu fyrri hálfleiks þegar Vitinho skaut í bakið á Alan Dzagoev en þaðan fór boltinn í netið.

Romelu Lukaku jafnaði metin á 64. mínútu eftir fyrirgjöf frá Paul Pogba og aðeins 66 sekúndum síðar þá skoraði Marcus Rashford eftir stungusendingu frá  Juan Mata. Markið skráist á 66. mínútu. Juan Mata átti mjög góðan leik í kvöld.

Marcus Rashford var búinn að fá nokkur góð færi í leiknum og átti meðal annars stangarskot í upphafi leiksins. Loksins náði hann að koma boltanum í netið.

Basel vann 2-0 útisigur á Benfica á sama tíma og tryggði sér annað sæti riðilsins og þar með sæti í sextán liða úrslitum Meistaradeildarinnar.