Vildi ekki Mohamed Salah

Unai Emery, knattspyrnustjóri Arsenal, átti kannski smá þátt í því að Mohamed Salah endaði hjá Liverpool sumarið 2017. Stjóri Arsenal fær nú það verkefni að reyna að stoppa Egyptann á morgun.

Unai Emery sagði frá því á blaðamannafundi fyrir leik Liverpool og Arsenal í ensku úrvalsdeildinni á morgun að Emery hafi fengið tækifæri til að kaupa Mohamed Salah þegar hann var stjóri Paris Saint Germain.

„Við ræddum möguleikann á því að Paris Saint-Germain myndi kaupa Salah þegar hann var að spila hjá Roma,“ sagði Unai Emery.

„Við höfum einhverjar efasemdir og svo fór hann til Liverpool í júní 2017. Hann hefur eytt öllum þessum efasemdum. Nú erum við að tala um einn af fimm bestu fótboltmönnum í heimi,“ sagði Unai Emery.

Unai Emery reveals he opted against signing Mohamed Salah at PSG | By Sachin Nakrani https://t.co/rIC78BNCbR

— Guardian sport (@guardian_sport) December 28, 2018

Unai Emery þurfti að velja og hafna þegar kom að því að styrkja sóknarleik Parísarliðsins þetta sumar 2017. Hann fékk líka enga meðaljóna í stað Salah.

PSG keypti nefnilega Neymar frá Barcelona fyrir 222 milljónir evra í byrjun ágúst og fékk síðan Kylian Mbappé á láni frá Mónakó í lok ágúst.

Liverpool tók Mohamed Salah opnum örmum og sá hefur slegið í gegn.

Mohamed Salah skoraði 44 mörk í 52 leikjum í öllum keppnum á sínu fyrsta tímabili og lagði upp 16 mörk til viðbótar. Á sínu öðru tímabili hefur hann skorað 15 mörk og lagt upp sjö til viðbótar í 26 leikjum.

Mohamed Salah er þegar búinn að skora 12 mörk og gefa 7 stoðsendingar í 19 leikjum í ensku úrvalsdeildinni þar af er hann með 9 mörk og 5 stoðsendingar í síðusutu 11 leikjum. Liverpool hefur náði í 31 stig af 33 mögulegum í þeim.

Leikur Liverpool og Arsenal fer fram á Anfield á morgun, laugardaginn 29. desember, en hann hefst klukkan 17.30 og verður sýndur beint á Stöð 2 Sport.