Arsenal hálfa leið í úrslitin

Arsenal fór langt með að tryggja sér sæti í úrslitaleik Evrópudeildarinnar eftir tveggja marka sigur á Valencia á Emirates vellinum í Lundúnum.

Spænsku gestirnir komust yfir snemma leiks, Mouctar Diakhaby skoraði á 11. mínútu eftir slæman varnarleik hjá Skyttunum í hornspyrnu.

Heimamenn voru hins vegar ekki lengi að jafna leikinn. Neto fór út úr marki Valencia til þess að mæta Pierre-Emerick Aubameyang en í staðinn náði Aubameyang að senda boltann fyrir markið þar sem Alezandre Lacazette þurfti bara að stýra honum í tómt netið.

Frakkinn var svo aftur á ferðinni á 26. mínútu þegar hann skallaði boltann í netið og kom Arsenal yfir. Markið skrifast þó frekar á Neto í markinu sem gerði önnur dýr mistök. Lacazette á lausan skalla beint á Neto en markmaðurinn slær boltann upp í þverslána og þaðan fór hann inn fyrir línuna.

Eftir fjörugan fyrri hálfleik höfðu mörkin hægar um sig í þeim seinni og það var ekki fyrr en í uppbótartíma leiksins þegar Aubameyang skoraði hið langþráða þriðja mark.

Lacazette, sem hafði fengið urmull af færum í leiknum, átti skot sem Neto náði að klóra út úr markinu en Sead Kolasinac nær að koma boltanum á Aubameyang sem hamraði boltann í netið.

Leiknum lauk með 3-1 sigri Arsenal sem fer með tveggja marka forskot inn í seinni leikinn. Valencia náði þó í mikilvægt útivallarmark.