Eriksen lék sama leik og Beckham

Christian Eriksen gaf sína tíundu stoðsendingu í ensku úrvalsdeildinni á tímabilinu þegar Tottenham beið lægri hlut fyrir Liverpool, 2-1, á Anfield í gær.

Þetta er fjórða tímabilið í röð sem Eriksen leggur upp tíu mörk eða meira í ensku úrvalsdeildinni. Aðeins einn annar leikmaður hefur afrekað það; David Beckham á árunum 1997-2001.

10 - Christian Eriksen is just the second player to assist 10+ Premier League goals in four successive seasons, after David Beckham between 1997-98 and 2000-01. Generosity. #LIVTOT

— OptaJoe (@OptaJoe) March 31, 2019

Eriksen er á sínu sjötta tímabili hjá Tottenham. Í 199 deildarleikjum fyrir Spurs hefur Daninn lagt upp 58 mörk og skorað 46 sjálfur.

Eriksen er í 21. sæti á listanum yfir þá sem hafa átt flestar stoðsendingar í sögu ensku úrvalsdeildarinnar. Ryan Giggs er langefstur með 162 stoðsendingar.

Eden Hazard er sá eini sem hefur lagt upp fleiri mörk (11) í ensku úrvalsdeildinni í vetur en Eriksen.

Tottenham er í 3. sæti deildarinnar. Liðið hefur ekki unnið deildarleik síðan 10. febrúar. Næsti leikur Spurs er gegn Crystal Palace á miðvikudaginn.