Börn fundu óblandað og sterkt amfetamín

Ellefu ára börn á Suðurnesjum fundu poka af „óblönduðu og sterku“ amfetamíni er þau voru úti við leik fyrir skömmu. Þessu greinir lögreglustjórinn á Suðurnesjum frá á Facebook-síðu sinni.

„[...] og þarf ekki að spyrja að leikslokum hefðu yngri börn fundið þessa poka,“ segir í færslunni.

Er eigandi pokanna hvattur til að koma á stöðina að „sækja“ pokana sína. Þá er komið á framfæri hinu mesta hrósi til barnanna – en sömu sögu er ekki að segja um eiganda efnanna.