Lögreglan á höfuðborgarsvæðinu var með 70 mál á sinni könnu frá því klukkan fimm í morgun og til fimm síðdegis í dag.
Rétt fyrir klukkan sex í morgun óskaði starfsfólk verslunar eftir aðstoð lögreglu vegna þjófnaðar á heyrnartólum. Sá sem grunaður var um þjófnaðinn sparkaði í öryggisvörð sem hafði afskipti af honum. Var maðurinn handtekinn og fluttur á lögreglustöð.
Í hverfi 101 var tilkynnt um mann sem gekk á milli bíla og braut á þeim hliðarspegla. Þegar lögregla fann manninn var hann í annarlegu ástandi og með ýmsa muni í fangi. Síðar kom í ljós að þessi munir voru úr innbroti í fyrirtæki þar skammt frá. Var maðurinn handtekinn og vistaður í fangageymslu.
Rétt fyrir klukkan eitt í dag barst lögreglu tilkynning um ökumann sem hafði ekið á umferðarskilti án þess að tilkynna það. Er ökumaðurinn ófundinn.
Þá var hljóðkerfi stolið úr gámi í Mosfellsbæ á ellefta tímanum í morgun.
Gekk á milli bíla og braut hliðarspegla
Birgir Olgeirsson skrifar
