Bráðabirgðagosbrunnar hafa verið settir upp og almenningssundlaugar verða opnar fram á kvöld í París til að hjálpa borgarbúum að takast á við allt að fjörutíu stiga hita sem spáð er í vikunni. Hitabylgjan nær einnig til Þýskalands, Sviss og Belgíu þar sem met gætu fallið.
Hitinn á að ná 35 stigum í norðanverðu Frakklandi í dag en búist er við að hann nái hámarki undir lok vikunnar á fimmtudag og föstudag. Mikill raki í lofti þýðir að raunhitinn í París gæti verið nær 47°C síðar í vikunni. Mögulegt er talið að hitamet fyrir júní gætu fallið þar og í nágrannaríkjunum.
Yfirvöld ætla að dreifa vatni og virkja áætlanir til að aðstoða viðkvæma hópa eins og aldraða. Parísarborg er nú á þriðja viðbúnaðarstigi vegna öfgahita en fjórða stigið hefur aldrei verið notað.
Þannig hafa borgaryfirvöld skilgreint 900 „svala staði“ eins og garða, loftkældar opinberar byggingar og svæði þar sem tímabundnum gosbrunnum hefur verið komið fyrir. Þrettán almenningsgörðum verður einnig haldið opið lengur en vanalega enda spáir franska veðurstofan því að hitinn fari ekki undir tuttugu gráður víða, jafnvel að nóttu til.
Að sögn breska ríkisútvarpsins BBC hefur hitabylgjunni nú verið líkt við þá sem dró hátt í 15.000 manns til dauða í ágúst árið 2003. Hitinn var þá yfir fjörutíu gráðum í rúma viku sums staðar. Flestir þeirra sem létust af völdum hitans voru eldri borgarar.
Hitabylgjan nú er rakin til háþrýstisvæðis yfir Atlantshafi sem dælir heitu lofti frá norðanverðri Afríku og Spáni yfir meginlandið. Á Spáni er gert ráð fyrir hita yfir 35 gráðum víðast til og sums staðar allt að 42 gráðum.
Parísarbúar búa sig undir allt að fjörutíu stiga hita

Tengdar fréttir

Yfir tuttugu gráðum hlýrra en vanalega á Grænlandi og ís í lágmarki
Hafísþekjan hefur ekki verið svo lítil á þessum árstíma frá því að gervihnattamælingar hófust og bráðnun á Grænlandsjökli er nú þegar eins og hún gerist mest yfir hásumarið.

Mögnuð ljósmynd sýnir afleiðingar hlýindanna á Grænlandi
Ljósmynd sem sýnir sleðahunda draga snjósleða í norðvesturhluta Grænlands þykir varpa óhugnanlegu ljósi á þau skilyrði sem sköpuðust við landið vegna óvenjulegra hlýinda í síðustu viku.