„Ég er bæði orðlaus og rasandi eftir áhorf á Kastljós rétt í þessu. Þetta var held ég nýtt met,“ skrifar þingmaðurinn Helga Vala Helgadóttir á Facebook-síðu sína í kvöld. Bráðabirgðaskýrsla um hópsýkingu á Landakoti var umræðuefni þáttarins og var Már Kristjánsson, formaður farsóttanefndar Landspítalans, gestur þáttarins.
Í þætti kvöldsins var Már inntur eftir viðbrögðum vegna skýrslunnar. Sagðist hann ekki telja að misbrestur hefði orðið í starfseminni. Sjálfum finnist honum tal um lögreglurannsókn ekki vera til þess fallið að hjálpa við að standa vörð um öryggi sjúklinganna, enda bendi ekkert til þess að ásetningur eða vanræksla hafi valdið því að hópsýkingin kom upp.
Einar Þorsteinsson, umsjónarmaður Kastljóss, krafðist frekari svara varðandi ráðstafanir spítalans þegar leið á þáttinn, enda taldi hann augljóst að einhver misbrestur hefði orðið. „Þetta er náttúrulega mjög ódýrt. Þú getur ekki horft inn í kristalskúlu og sagt: Það mun koma faraldur á Landakoti,“ sagði Már.
„Það er ykkar hlutverk að horfa inn í kristalskúluna, þið eruð okkar færasta fólk,“ svaraði Einar.
„Átti fréttamaðurinn að hætta að spyrja?“
Fleiri blanda sér í umræðurnar við færslu Helgu Völu og virðast nokkrir einnig ósáttir við framgöngu þáttastjórnandans. Á meðal þeirra sem tekur upp hanskann fyrir hann er Ragnhildur Sverrisdóttir, upplýsingafulltrúi Landsvirkjunar.
„Nú skil ég ekki. Átti fréttamaðurinn að hætta að spyrja, þegar hann fékk engin svör í fyrsta, annað eða þriðja skipti? Var ekki eðlilegt að hann reyndi að fá svör? Ég vil gjarnan skilja hvernig berskjaldaðasti hópurinn virðist hafa verið minnst varinn,“ skrifar Ragnhildur.
Einar sjálfur svarar einnig og segir athyglisvert að Helga Vala taki þáttinn nærri sér. Hann hafi einfaldlega spurt hvort það væri rétt ályktun af lestri skýrslunnar að farsóttanefnd Landspítalans hafi ekki gert mistök í viðbúnaði sínum. Helga Vala er ósammála því.
„Einar það var nú ekki spurningin þegar þráspurt var, með framígripum, hvers vegna ekki var gætt betur að sóttvörnum og hvort það væri á starfsfólk leggjandi að eiga það á hættu að smita. Hverju átti hann að svara? Vildi spyrillinn fá svarið: “sjúklingarnir hefðu betur verið lokaðir inni án umönnunar starfsfólks” eða “við hefðum betur látið starfsfólkið dvelja á spítalanum”,“ spyr Helga Vala.
„Þegar skýrslan er lesin virðast einmitt ekki hafa verið gerð mannleg mistök heldur kerfisgalli - ófullnægjandi húsnæði og aðstæður. Hvað eiga starfsfólkið og yfirmenn að gera í því? Neita að mæta í vinnuna til að sinna sjúklingum?“
Spurningarnar eðlilegar miðað við alvarleika málsins
Einar segist ósammála því að hafa gripið mikið frammí, hann hafi verið kurteist og spurningarnar eðlilegar í ljósi þess hversu alvarlegt málið er.
„Af hverju í ósköpunum má ekki spyrja um gæði þessarar skýrslu? Og hvort stjórnendur séu að víkja sér undan ábyrgð? Hvort mistök hafi verið gerð? Til hvers heldurðu eiginlega að fjölmiðlar séu? Svo er það bara annað viðtal um fjársvelt heilbrigðiskerfi.“
Þá ritar Snærós Sindradóttir, verkefnastjóri RÚV núll og dóttir Helgu Völu, færslu á sína Facebook-síðu þar sem hún segir ekkert að viðtalinu.
„Hverju eruð þið að kalla eftir? Fréttamönnum sem spyrja einskis og sérfræðingum sem þurfa aldrei að svara fyrir það sem þeir halda fram?“
