229 þingmenn greiddu atkvæði með ákæru og 202 gegn henni. Níu þingmenn Repúblikanaflokksins greiddu atkvæði með Demókrötum.
Ákvörðunin um það hvort Bannon verði formlega ákærður er nú í höndum ríkissaksóknara Washington DC og dómsmálaráðuneytisins, samkvæmt frétt Politico.
Merrick Garland, dómsmálaráðherra, vildi ekki tjá sig um málið í dag að öðru leyti en að dómsmálaráðuneytið myndi fylgja lögum. Samkvæmt lögum gæti verið hægt að dæma Bannon til að greiða allt frá hundrað dölum til hundrað þúsund dala í sekt og sitja í fangelsi í allt að ár.
Hvítþvottur eða stuðningur
Það að einungis níu þingmenn hafi greitt atkvæði með ákæru er samkvæmt frétt New York Times til marks um það hve lítinn vilja Repúblikanar hafa til að rannsaka árásina á þinghúsið í janúar. Þeir vilji frekar hvítþvo árásina, hunsa hana eða ýta undir þær ásakanir sem leiddu til hennar.
Stuðningsmenn Trumps ruddu sér leið inn þinghúsið til að koma í veg fyrir formlega staðfestingu úrslita forsetakosninganna í fyrra. Það gerðu þau á grundvelli ítrekaðra og ósannra fullyrðinga Trumps og bandamanna hans um að umfangsmikið kosningasvindl hefði kostað forsetann fyrrverandi sigur.
Fjölmargir þingmenn Repúblikanaflokksins neita enn að segja opinberlega að Joe Biden sé réttkjörinn forseti Bandaríkjanna.
Komu í veg fyrir stofnun hlutlausrar rannsóknarnefndar
Í kjölfar árásarinnar stóð til að stofna ópólitíska rannsóknarnefnd en Repúblikanar komu í veg fyrir það. Demókratar stofnuðu því þingnefnd sem er að rannsaka árásina. Repúblikanar tilnefndu tvo þingmenn til þeirrar nefndar. Það voru þeir Jim Jordan og Jim Banks en áðir eru yfirlýstir og dyggir stuðningsmenn Donalds Trump, fyrrverandi forseta, og báðir greiddu atkvæði gegn því að staðfesta niðurstöður forsetakosninganna, sem Trump tapaði og Joe Biden vann. Þar að auki hafa þeir báðir tekið undir ósannar yfirlýsingar Trumps um að umfangsmikið kosningasvindl hafi kostað hann sigur.
Nancy Pelosi, forseti fulltrúadeildarinnar, neitaði að hleypa þeim í nefndina en samþykkti þrjá aðra. Repúblikanar neituðu því þó og sögðust ætla að stofna eigin nefnd.
Sjá einnig: Pelosi neitar stuðningsmönnum Trumps um sæti í rannsóknarnefnd
Fyrir atkvæðagreiðsluna í kvöld sendi Trump frá sér tilkynningu þar sem hann sagði forsetakosningarnar í fyrra hafa verið raunverulegu uppreisnuna. Árásin á þinghúsið í janúar hefði bara verið mótmæli.
Bannon hefur um árabil verið bandamaður Trumps og var ráðgjafi hans í kosningabaráttunni fyrir kosningarnar 2016 og þegar hann flutti í Hvíta húsið. Hann var þó rekinn úr Hvíta húsinu eftir nokkra mánuði.
Trump rak Bannon eftir að haft var eftir honum í bókinn Fire and Fury eftir Michael Wolff, að Donald Trump yngri, sonur forsetans fyrrverandi, hefði framið landráð þegar hann fór á fund í Trump-turni í New York fyrir kosningarnar 2016.
Rússneskur lögfræðingur boðaði til fundarins og sagði tilgang hans vera að koma upplýsingum til hans sem kæmu sér illa fyrir Hillary clinton, mótframbjóðanda Trumps. Lögfræðingurinn, sem heitir Natalia Veselnitskaya, sagði í tölvupóst til Trumps yngri að þær upplýsingar væru liður í aðgerðum stjórnvalda Rússlands til að styðja við framboð Trumps.
Haft var eftir Bannon að Trump yngri hefði aldrei átt að fara á þennan fund og þess í stað hefði hann átt að hringja í Alríkislögreglu Bandaríkjanna.
Áður en hann var rekinn lýsti Bannon því yfir að hann hefði ekki verið að tala um Trump yngri heldur Paul Manafort, fyrrverandi kosningastjóra Trumps, sem var einnig á fundinum.
Sjá einnig: Trump vill ekki fyrirgefa Bannon
Manafort var árið 2018 dæmdur í fangelsi fyrir bankasvik og önnur brot. Trump náðaði hann þó á síðustu vikum forsetatíðar sinnar.
Trump náðaði Bannon
Eitt af síðustu embættisverkum Trumps var að náða einnig Bannon. Hann hafði verið ákærður fyrir taka fé út úr fjáröfluninni We Build the Wall. Bannon hafði safnað fúlgum fjár á þeim grundvelli að peningarnir ættu að fara í byggingu múrs á landamærum Bandaríkjanna og Mexíkó.
Bannon hafði þó aldrei verið sakfelldur vegna þessa en réttarhöldin féllu niður vegna náðunarinnar.
Sjá einnig: Trump náðaði Steve Bannon
Sagði að allt yrði vitlaust
Þingmennirnir í rannsóknarnefndin vilja ræða við Bannon um samskipti hans við Trump í aðdraganda árásarinnar á þinghúsið og telja mögulegt að hann sitji á mikilvægum upplýsingum ætlanir Trump-liða varðandi það að grafa undan sigri Bidens og varðandi árásina sjálfa.
Meðlimir nefndarinnar vísa sérstaklega til ummæla Bannons í útvarpsþætti sínum þann fimmta janúar, degi fyrir árásina á þinghúsið, þar sem hann sagði meðal annars: „Það verður allt vitlaust á morgun“.
