Dybala skoraði tvö er Rómverjar tylltu sér á toppinn

Lærisveinar José Mourinho í Roma tylltu sér á topp ítölsku úrvalsdeildarinnar í knattspyrnu er liðið vann öruggan 3-0 sigur gegn Monza í kvöld.

Paulo Dybala kom heimamönnum yfir á 18. mínútu leiksins eftir stoðsendingu frá Tammy Abraham áður en Dybala var svo aftur á ferðinni þegar hann tvöfaldaði forystu liðsins eftir rúmlega hálftíma leik.

Staðan var því 2-0 þegar gengið var til búningsherbergja, en Roger Ibanez breytti stöðunni í 3-0 á 61. mínútu með góðum skalla eftir fyrirgjöf frá Lorenzo Pellegrini.

Ekki urðu mörkin fleiri og niðurstaðan því 3-0 sigur Roma. Liðið situr nú í það minnsta tímabundið á toppi ítölsku úrvalsdeildarinnar með tíu stig eftir fjóra leiki, en Torino, Atalanta, Lazio og Napoli geta öll jafnað Roma að stigum í umferðinni.

Monza situr hins vegar sem fastast á botni deildarinnar, enn í leit að sínum fyrstu stigum.