Car­val­ho tryggði Liver­pool sigur með síðustu spyrnu leiksins

Liverpool vann hádramatískan sigur á Newcastle United í ensku úrvalsdeildinni í kvöld. Lokatölur 2-1 Liverpool í vil en Newcastle var yfir í hálfleik.

Eftir að skora níu mörk gegn Bournemouth um helgina þá fengu heimamenn aðeins erfiðara verkefni í kvöld. Það virtist lengi sem Liverpool ætlaði að tapa stigum en á endanum tókst þeim að knýja fram sigur.

Sænski framherjinn Alexander Isak var að spila sinn fyrsta leik fyrir Newcastle og hann skoraði sitt fyrsta mark í ensku úrvalsdeildinni þegar sjö mínútur voru eftir af fyrri hálfleik. Staðan 0-1 í hálfleik og reikna má með að Jürgen Klopp hafi aðeins hækkað róminn í hálfleik.

Roberto Firmino jafnaði metin þegar klukkustund var liðin með góðu skoti innan vítateigs eftir sendingu Mohamed Salah. Staðan 1-1 og sóknarþungi Liverpool jókst með hverri mínútunni sem leið.

Það voru komnar átta mínútur fram yfir venjulegan leiktíma þegar heimamenn fengu hornspyrnu. Boltinn kom inn á teig og skoppaði manna á milli áður varamaðurinn Fabio Carvalho náði einhvern veginn að slengja fæti í knöttinn og koma honum í netð.

Það bókstaflega trylltist allt á Anfield og í kjölfarið var flautað til leiksloka. Lokatölur 2-1 Liverpool í vil og liðið komið upp í 5. sæti með átta stig eftir fimm leiki. Newcastle er á sama tíma í 11. sæti með sex stig.