F-riðill á HM í Katar: Síðasti séns gullkynslóðarinnar

Vísir telur niður í heimsmeistaramótið í Katar sem hefst 20. nóvember næstkomandi. Á næstu dögum tökum við fyrir einn riðil í keppninni á hverjum degi og að þessu sinni er það F-riðillinn sem fær á sig sviðsljósið.

Belgía og Króatía skipa riðilinn ásamt Kanada og Marokkó. Fyrrnefndu liðin eru talin líklegri en hin til að fara upp úr riðlinum en þau fengu bæði verðlaun á síðasta móti.

Bæði Belgía og Króatía þurftu að þola tap fyrir heimsmeisturum Frakka á lokametrunum á síðasta heimsmeistaramóti. Belgar töpuðu 1-0 í undanúrslitum áður en þeir unnu bronsleikinn við England en Króatar töpuðu úrslitaleiknum 4-2 og hlutu silfur.

Marokkó hefur ekki komist upp úr riðlakeppninni í 46 ár en sami árafjöldi er síðan Kanada tók þátt í fyrsta og eina skipti fram að þessu. Kanada kom mörgum á óvart er liðið fór létt með undankeppni CONCACAF og varð fyrst liða þaðan til að tryggja sæti sitt á mótinu.

Í flestum tilfellum eru Bandaríkin og Mexíkó þar með yfirburði en spennandi ung kynslóð leikmanna, leidd af Alphonso Davies og Jonathan David, fór fyrir kanadíska liðinu. Liðið hefur verið í mikilli sókn og fór upp í 33. sæti heimslistans í febrúar og hefur aldrei verið eins ofarlega.

Stjarnan Davies, sem leikur með Bayern í Þýskalandi, mun þó að öllum líkindum missa af upphafi mótsins og má vel vera að hann komist ekkert á völlinn í riðlakeppninni. Óskrifuð blöð eru í vörn liðsins þar sem flestir spila ýmist með Montreal og Toronto í MLS-deildinni eða minni spámönnum í Evrópu. 39 ára fyrirliðinn Atiba Hutchinson nær að uppfylla ólíklegan draum og mun reynast mikilvægur sem akkeri á miðjunni fyrir framan vörnina.

Þjálfarinn Vahid Halilhodžić kom Marokkó á HM en var rekinn í ágúst eftir slakan árangur í Afríkukeppninni í byrjun árs og deilur við knattspyrnusamband landsins í kjölfarið. Þetta er í þriðja skipti á ferlinum sem Halilhodžić kemur liði á HM en fær ekki að stýra liði á mótinu. Hann kom Fílabeinsströndinni á HM 2010 en var rekinn fyrir mót og stýrði Japan á HM 2018 en fékk að taka pokann sinn fyrir upphafsflautið í Rússlandi.

Brotthvarf Halilhodžić þýðir að Marokkó endurheimtir sína helstu stjörnu, Hakim Ziyech, leikmann Chelsea. Hann var ekki í leikmannahópnum í Afríkukeppninni í byrjun árs eftir að hafa lent í útistöðum við þjálfarann. Hann mun leiða sóknarlínu liðsins ásamt Amine Harit, Marseille, Sofiane Boudal, Angers, og Youssef En-Nesyri, Sevilla, auk ungra og efnilegra leikmanna.

Yassine Bounou, markvörður Sevilla, stendur milli stanganna hjá liðinu og þá skipa Achraf Hakimi (PSG) og Noussair Mazraoui (Bayern) bakvarðarstöðurnar.

Belgía fer að nálgast síðasta snúning með gullkynslóð sinni þar sem menn eru komnir til ára sinna. Toby Alderweireld (33), Jan Vertonghen (35), Axel Witsel (33) og Dries Mertens (35) eru líkast til á sínu síðasta stórmóti og þá eru þeir Thibaut Courtois, Thomas Meunier, Kevin De Bruyne, Yannick Carrasco og Eden Hazard um þrítugt.

Hazard er í hópnum þrátt fyrir skort á leiktíma hjá Real Madrid en hrun hans eftir rándýr skipti frá Chelsea til spænsku höfuðborgarinnar árið 2019 hefur verið með ólíkindum. Hann er þó enn fyrirliði belgíska liðsins og fróðlegt verður að sjá hvort eitthvað sé eftir á tanknum hjá honum blessuðum.

Fastlega má gera ráð fyrir að Belgar fljúgi upp úr riðlinum og Króatar fylgi þeim. Það er yfirleitt í ökkla eða eyra hjá Króötum á HM en þeir fengu brons 1998 og silfur 2018. Á hinum þremur mótunum, 2002, 2006 og 2014 komst liðið ekki upp úr riðlakeppninni. Það er eflaust besti möguleiki Kanadamanna og Marokkóa að þeir króatísku lendi á slíku móti.

Luka Modrić er orðinn 37 ára en mun að venju leiða liðið. Marcelo Brozović og Mateo Kovačić eru honum til halds og trausts á miðjunni og þá er Ivan Perišić á sínum stað. 33 ára gömlu miðverðirnir Dejan Lovren og Domagoj Vida eru einnig í hópnum en óvíst er með hlutverk þeirra þar sem nýjir og yngri miðverðir, þeir Josko Gvadiol, Josip Sutalo og Martin Erlić, hafa spilað í auknum mæli í aðdraganda móts.

Þjálfarar liðanna í F-riðlinum:

Belgía – Hinn 49 ára gamli Roberto Martínez frá Spáni hefur stýrt liðinu síðan árið 2016 og náði bronsi á HM í Rússlandi en féll úr keppni í 8-liða úrslitum fyrir Evrópumeisturum Ítala á EM í fyrra. Þjálfaði áður Swansea, Wigan og Everton á Englandi við góðan orðstír en enska C-deildin og FA-bikarinn eru einu titlarnir á ferilskránni.

Króatía - Hinn 56 ára gamli Zlatko Dalić hefur verið þjálfari Króata frá 2017 og stýrði liðinu til silfurs á HM í Rússlandi. Hefur annars þjálfað lengst af í Miðausturlöndum og á silfur í sádi-arabísku deildinni og gull frá Furstadæmunum. Var mikið gagnrýndur eftir slakan árangur Króata í Þjóðadeildinni 2020-21 en liðið svaraði vel fyrir sig og vann starkan riðil með Dönum og Frökkum í haust.

Kanada – Hinn 47 ára gamli John Herdman frá Englandi er þjálfari Kanada. Hann hefur farið athyglisverða leið þar sem hans eina þjálfunarreynsla var með kvennalandslið áður en hann tók við núverandi starfi árið 2018. Hann var þjálfari Nýja-Sjálands frá 2006 til 2011 og kvennaliðs Kanada frá 2011 til 2018 þegar hann hætti til að taka við karlaliðinu. Fór á HM 2007 og 2011 með Nýsjálendingum og 2015 með Kanada. Hann er með hæsta sigurhlutfall þjálfara í sögu Kanada og var liðið það fyrsta í Norður-Ameríku til að tryggja farseðil sinn, þvert á spár.

Marokkó – Hinn 47 ára gamli Walid Regragui er þjálfari Marokkó tók við liðinu í ágúst af Bosníumanninum Vahid Halilhodžić sem kom liðinu á mótið. Regragui lék 45 landsleiki milli 2001 og 2009 en hefur sem þjálfari stýrt bæði Botola og Wydad til meistaratitils í Marokkó og vann katörsku deildina með Al-Duhail.

Stærstu stjörnurnar:

Ivan Perišić (Króatía) – 33 ára kantmaður Tottenham á Englandi. Skoraði í úrslitaleiknum á síðasta móti þar sem Króatar töpuðu 4-2 fyrir Frökkum. Á glæstan feril að baki í Þýskalandi og á Ítalíu en skipti til Tottenham í sumar. Lykilmaður í sóknarleik Króata.

Luka Modrić (Króatía) – 37 ára miðjumaður Real Madrid á Spáni. Er þrátt fyrir aldurinn enn á meðal allra bestu miðjumanna heims. Stýrir spili liðsins frá A til Ö og var valinn besti leikmaður HM 2018 auk þess að vera valinn besti leikmaður heims það ár. Raðað inn titlum með Real Madrid og segir sitt um gæðin að hann sé þar enn lykilmaður á þessum aldri.

Hakim Ziyech (Marokkó) – 29 ára kantmaður Chelsea á Englandi. Marokkóbúar fagna því að fá Ziyech aftur inn í hópinn eftir að hann var skilinn útundan á Afríkumótinu fyrr á árinu þar sem liðið olli vonbrigðum. Stærsta nafnið í léttleikandi sóknarlínu.

Achraf Hakimi (Marokkó) – 24 ára bakvörður Paris Saint-Germain í Frakklandi. Besti leikmaður liðsins ásamt Ziyech sem hefur verið á meðal betri bakvarða í Evrópuboltanum undanfarin ár. Byrjaði ferilinn með Real Madrid og skoraði tvö deildarmörk úr bakverðinum 19 ára gamall 2017-18 áður en hann sprakk út hjá Dortmund í Þýskalandi hvar hann lék í tvö tímabil. Keyptur dýrum dómi til Parísar eftir eina leiktíð með Inter hvar hann vann ítalska meistaratitilinn.

Kevin De Bruyne (Belgía) – 31 árs miðjumaður Manchester City á Englandi. Einn besti leikmaður heims og hefur verið valinn besti leikmaður ensku úrvalsdeildarinnar tvisvar á síðustu þremur árum. Þriðji í vali á besta leikmanni heims í ár og mun draga belgíska liðið áfram.

Romelu Lukaku (Belgía) – 29 ára sóknarmaður Inter Milan á Ítalíu. Hefur verið að glíma við meiðsli en ætti að vera ferskur á mótinu. Hefur skorað 68 mörk í 102 landsleikjum og verið fastamaður í framlínu Belga síðustu ár. Gekk illa hjá Chelsea í fyrra en skorar alltaf fyrir landsliðið. Fjögur mörk hans á HM 2018 komu gegn Túnis og Panama, þarf að stíga upp gegn stóru liðunum ef Belgar ætla langt.

Alphonso Davies (Kanada) – 22 ára bakvörður Bayern Munchen í Þýskalandi. Spilar þó yfirleitt framar á vellinum með landsliðinu sem birtist í fimm mörkum hans og átta stoðsendingum í 13 leikjum í undankeppninni. Óvíst með þátttöku hans á mótinu vegna tognunar í læri.

Atiba Hutchinson (Kanada) – 39 ára miðjumaður Beşiktaş í Tyrklandi. Fyrirliði Kanada og sá leikjahæsti í hópnum með 97 landsleiki. Spilaði með Öster og Helsingborg í Svíþjóð áður en hann fór til Kaupmannahafnar og vann dönsku deildina öll fjögur árin sín með FCK. Spilaði þrjú tímabil með PSV í Hollandi áður en hann skipti til Besiktas þar sem hann hefur verið lykilmaður frá 2013 og unnið þrjá tyrkneska meistaratitla. Er þó í meiðslaveseni eins og Davies og hefur ekkert spilað í tyrknesku deildinni í ár.

Fylgist með þessum:

Joško Gvardiol (Króatía) – 20 ára miðvörður RB Leipzig sem er einn sá allra eftirsóttasti í Evrópu. Spilaði síðustu tvo leiki liðsins í Þjóðadeildinni í haust og er hluti af kynslóðaskiptum í miðverðinum hjá Króötum. Þeir 33 ára gömlu Dejan Lovren og Domagoj Vida eru í hópnum en þeir Martin Erlić og Josip Šutalo hafa spilað ívið meira auk Gvardiol á kostnað þeirra eldri.

Jérémy Doku (Belgía) – 20 ára kantmaður Rennes í Frakklandi. Heillaði margan á EM í fyrra enda gríðarlega snöggur og teknískur spilari. Hefur aðeins skorað þrjú deildarmörk í 50 leikjum í Frakklandi en skapar ávallt usla og eykur skemmtanagildi þegar hann er inni á vellinum.

Azzedine Ounahi (Marokkó) – 22 ára miðjumaður Angers í Frakklandi. Var leikmaður í 3. deild í Frakklandi þar til hann fékk tækifæri með Angers í efstu deild á síðustu leiktíð og var þar byrjunarliðsmaður. Spilaði ekki sinn fyrsta landsleik fyrr en á Afríkukeppninni í byrjun árs og skoraði þá tvö mörk í 4-1 sigri Marokkó á Lýðveldinu Kongó í mars, en sá sigur skaut þeim á HM.

Jonathan David (Kanada) – 22 ára framherji Lille í Frakklandi. Haítísk­ur innflytjandi sem ólst upp í Kanada frá sex ára aldri og var snemma ákveðinn í að spila í Evrópu. Fór 18 ára til Gent í Belgíu 2018 og fór beint í byrjunarlið liðsins hvar hann skoraði 30 mörk á tveimur tímabilum áður en hann skipti til Lille. Hefur verið á meðal eftirsóttari framherja Evrópu síðustu ár en gott HM gæti stimplað hann almennilega inn á stóra sviðið.