Vaknar við syngjandi uglu klukkan sex á morgnana

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Á þeim dögum sem ég fer í ræktina þá fer ég á fætur klukkan sex annars um sjö leytið. Hins vegar breyttist sú rútína alls hressilega fyrir um tveim mánuðum er yngsta dóttirin á heimilinu lærði á klukku.

Hún fékk sína eigin vekjaraklukku, sem er syngjandi Ugla sem hún býður góðan daginn þar til slökkt er á henni. 

Sem er svo sem ekki frásögu færandi nema fyrir þær sakir að að dóttir mín stendur staðföst á þvi að það henti henni besti að vakna alla daga eigi síður en klukkan sex eða tveim tímum áður en hún á að mæta í skólann.

Þegar ég spurði hana af því hvers vegna hún vildi vera vakna svona snemma, þá sagði hún “ það er gott að hafa góðan tíma til að fá sér að borða, lesa og útbúa nestið fyrir daginn” Ég hef því ekki átt annars kosta völ en drífa mig á fætur með henni.“

Hvað er það fyrsta sem þú gerir á morgnana?

„Ég hef mikinn áhuga á mannrækt og um daginn átti ég gott samtal við heilsuþjálfarann Vilhjálm Andra Einarsson, bróðir minn, um mikilvægi þess að byrja daginn á því að gefa sér tíma með sjálfum sér og taka ábyrgð á eigin vellíðan. Ég veit því fátt betra en að byrja daginn á því að drífa mig í frábæra infra-red hot pilates tíma hjá Karitas Lárusdóttir í World Class í Vatnsmýrinni.

Ef ég tek nýlega morgunrútínu dóttur minnar út fyrir sviga og þá morgna sem ég fer ekki í ræktina, þá freista ég þess að eiga tíma með sjálfri mér, læðist niður og reyni ekki að vekja aðra heimilismeðlimi, fæ mér ilmandi sjöstrand kaffi og renni yfir helstu fréttamiðla ásamt því að taka stöðuna á dagskrá dagsins.

Síðan, geng ég í það að að vekja heimilismeðlimina, bý um rúmin, útbý morgunmat og tek ör fund varðandi fjölbreytta dagskrá dætra minna til að passa upp á að lyklar, sunddót, fótboltaskór, blokkflauta, píanónótur, nesti, húfur og vettlingar séu með í för.“

Ef þú værir fræg sögupersóna úr bíómynd, hver værir þú þá? 

„Það er töluverð áskorun að velja eina sögupersónu og gæti valið litast af dagforminu en ef ég verð að velja eina þá væri það Indina Jones. Innblásturinn er nýlegur og kemur frá föstudags bíókvöld fjölskyldunnar þar sem við höfum nýverið horft á allar myndirnar.Það sem heillar eru ævintýrin og ferðalögin og ótrúlega þekking og útsjónarsemi sögupersónunar.

Sömuleiðis, kynnist ég frábæru hugsjónarfólki þegar ég bjó í New York og í sameiningu sköpuðum við verkefnið Himalyan Health initiative þar sem við ferðumst til Bir og Dharmsala sem kallaði á æsi spennandi og ævintýralega upplifun að kynnast öðrum menningarheimi. Tala nú ekki um að fljúga með rellu um Himalyanfjöllin og lenda á Kangra-Gaggal flugvelli í Dharmsala. En að loknum tveim vikum, man ég eftir að hafa hugsað við flugtak að að ég gæti vanist þessu ævintýrlega lífstíl, og hugsaði einmitt til Indian Jones.“

Í hvaða verkefni ertu að vinna helst í þessa dagana?

„Ég hóf nýlega störf á nýjum og spennandi vettvangi sem aðstoðarframkvæmdastjóri Vísindagarða HÍ og það er óhætt að segja þar er enginn dagur eins enda skrifstofa Vísindagarða staðsett í Mýrinni í Grósku, nýsköpunarsetri Vísindagarðar HÍ.Svæðið iðar að lífi og ég finn sannarlega fyrir nýsköpunaranda í húsinu. Þarna er vettvangur og í raun kraumandi suðupottur nýsköpunar og framfara. Við tölum um að þetta sé tengslatorg en þar kemur saman daglega fjölbreyttur hópur af skapandi og skemmtilegi fólki,sem vinnur þvert á greinar og geira.

Þarna er skapast bæði frjór jarðvegur fyrir tækifæri og mikilvæga raunverulega tengingu við starfsemi háskólans og atvinnulífs. Fyrirtækin sem eru með aðsetur á svæðinu eiga það sameiginlegt að fjárfesta í hugmyndum og nýrri tækni, þau hugsa út fyrir kassann með skýra sýn að leiðarljósi. Mér finnst þetta hrikalega spennandi vinnuumhverfi og gaman að vinna með öllu þessu hæfa og stórhuga fólki.

Eitt af okkar helstu verkefnum þessa daganna er alþjóðleg ráðstefna sem haldin verður í Grósku 4. Og 5.maí í samstarfi við International Association of Science Parks (IASP). Yfirskriftin er Nýsköpun 360°, , og er hluti af árlegri ráðstefnuröð samtakanna í Evrópu. Dagskráin er virkilega metnaðarfull og er skylduviðburður fyrir þá sem hafa áhuga á nýsköpun og vilja stækka tengslanet sitt. Ráðstefnan fer fram dagana 4. og 5.maí í Grósku í Vatnsmýrinni. Markmiðið með ráðstefnunni er að varpa ljósi á byltingarkennda græna nýsköpun á Íslandi og ræða þátt vísinda og nýsköpunar í innleiðingu nýrrar tækni sem getur skipt sköpum í baráttu mannkyns við loftslagsvánna.Á ráðstefnunni verður einnig horft til geimsins og þróun rannsókna á því sviði. Meðal framsögumanna eru erlendir og innlendir sérfræðingar í nýsköpun á sviði geimrannsókna, umhverfis- og orkumála. Þá verður rætt hvaða hlutverki ný tækni, líkt og kjarnasamruni og kolefnisföngun, mun gegna í framtíðinni. Á ráðstefnunni gefst gestum jafnframt tækifæri að kynnast ört vaxandi fyrirtækjum og efnilegum sprotafyrirtækjum sem vinna að heilsu-, lífsstíls-, orku- og loftslagslausnum.

Hvernig skipuleggur þú þig í vinnu?

Hugmyndafræði David Allen, Getting Things Done, hefur einnig reynst mér vel. 

Megininntakið í aðferðafræðinni er að geyma ekki skuldbindingar og hugmyndir í höfðinu heldur færa þær í kerfi sem þú getur treyst og með því er hægt að nota kerfið til að koma hlutum raunverulega í verk og vera skapandi. Hægt er styðjast við hin ýmisu forrit til að útfæra kerfið.“

Hvenær ferðu að sofa á kvöldin?

„Það er ekkert eitt svar við þessari spurningu þar sem háttatíminn er stöðug áskorun. Í hinum fullkomna heimi væri það klukkan tíu. 

Raunveruleikinn er hins vegar sá að það stýrist töluvert eftir dagsformi heimilisfólksinsaðilanna, suma daga eru allir í takt, búið að lesa,skrifa og reikna, finna föt fyrir næsta skóladag og allt komið í ró um 20.00 en aðra daga þá er ekki komin ró fyrr en um níu leytið. 

Auk þess dregur eignmaðurinn stundum fram einstaklega áhugaverðar heimildamyndir sem seinka háttatímanum en ég dreg línuna við miðnætti sem allra allra síðasta tímann til að svífa inn í draumalandið.“