„Það getur verið skrýtið að venjast gjör­breyttum líkama“

Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.

Hvað finnst þér skemmtilegast við tískuna?

Hvað hún fer í marga hringi! Það er alltaf jafn gaman að fylgjast með því þegar ný trend eru að byrja, að sjá flíkur koma aftur í tísku sem ég hélt að myndu aldrei fá að lifa aftur.

Hver er uppáhalds flíkin þín og af hverju?

Ég á mér sjaldan eina uppáhalds flík, en það fyrsta sem mér dettur í hug er bleika kápan mín sem er í miklu uppáhaldi. Ég var búin að manifesta bleika kápu í marga daga og allt í einu var ég komin með þessa fallegu bleiku kápu í hendurnar sem var eins og sniðin á mig en mamma kærasta míns gaf mér hana. 

Það er einhver skemmtileg orka í kápunni og dagurinn verður alltaf aðeins skemmtilegri þegar ég er í henni.

Eyðirðu miklum tíma í að velja föt hverju sinni?

Mér finnst mjög gott að vera komin með hugmynd að dressi daginn áður en ég fer á koddann á kvöldin, aðallega svo að morgnarnir séu aðeins rólegri og þægilegri. Það kemur auðvitað fyrir að ég vakna ekki í sama fýling og dressið sem ég valdi, en þá bara breyti ég aðeins til. 

Ef ég er eitthvað smá hikandi þá fæ ég oft loka álit frá kæró, sem kemur alltaf mjög sterkur inn!

Hvernig myndirðu lýsa stílnum þínum?

Einfaldur, þægilegur og getur verið mjög rómantískur. Ég klæði mig algjörlega eftir fíling, suma daga langar mig bara að vera í víðum buxum, kósí peysu og strigaskóm en aðra daga vil ég stríla mig í kjóla, dragt og hæla.

Hefur stíllinn þinn breyst mikið í gegnum tíðina og hvernig þá?

Ég hef alltaf haldið í einhvern ákveðin stíl sem ristir svona meira á dýptina hjá sjálfri mér. Ég hef alltaf haft gaman að gömlum kjólum, hvítum skyrtum með munstrum og pelsum. Þetta eru svona flíkur sem ég hef alltaf leitað mikið í frá því ég man eftir mér. 

Annars þá hef ég þurft að aðlaga mig aðeins að öðrum stíl eftir að ég varð ólétt en það leið ekki langur tími þar til ég passaði ekki í neinar buxur og þurfti að hugsa aðeins út fyrir boxið. Það getur verið skrýtið og stundum erfitt að venjast gjörbreyttum líkama og aðlaga sig að nýjum og fallegum líkamsvexti. 

Ég er búin að elska að vera í low waist buxum og pilsum, fallegum hlýrabolum, magastuttum peysum, gollum eða jökkum. Svo hef ég klæðst þröngum kjólum til að lefa bumbunni og öllum fallegu línunum að njóta sín. 

Fyrst og fremst hef ég hugsað um að mér líði vel í fötunum mínum og hvernig ég get notið þess að vera ólétt á hverjum degi.

Hvaðan sækirðu innblástur í tískunni?

Frá öllu mögulegu. Fólki, stöðum og hlutum.

Ertu með einhver boð og bönn þegar það kemur að klæðaburði?

Það eina sem mér finnst kjánalegt er að klæða sig ekki eftir veðri. Það er mikilvægt að hafa þetta í huga núna þegar veturinn nálgast á Íslandi, fjárfesta í góðum og þykkum yfirhöfnum, fallegum húfum eða hettum. Ég á alltaf til grófa og vatnshelda vetrarskó til að komast á milli staða á verstu dögunum.

Hver er eftirminnilegasta flík sem þú hefur klæðst og af hverju?

Ég tók einn vetur þar sem ég var dugleg að fara í þröngan hlébarða samfesting þegar ég fór út á djammið. Það var mjög skemmtileg flík og gaf mér ákveðinn karakter stundum. Hún er örugglega eftirminnileg þar sem ég á hana ekki lengur í dag og hugsa stundum til hennar.

Býrðu yfir einhverju góðu ráði þegar það kemur að tísku?

Alltaf að klæða sig fyrir þig og fylgja innsæinu. Þú veist alltaf hvað sjálfinu finnst flott og skemmtilegt. Það þarf bara að muna að hlusta á það!

Hér er hægt að fylgjast með Vöku á samfélagsmiðlinum Instagram.