Stutt í að LinkedIn breytist líka á Íslandi og verði aðalmiðillinn í ráðningum

Það sem við höfum verið að sjá erlendis á síðustu 2-3 árum, er að þær nýjungar sem LinkedIn hefur verið að koma með fyrir atvinnulífið hafa skilað því að þetta er einfaldlega orðið aðalmiðillinn þegar kemur að ráðningum og því að hafa forskot í að markaðssetja vinnustaði fyrir hæfileikaríkt fólk.“

Mannauðsdagurinn 2023 verður haldinn á föstudaginn en þetta er stærsti árlegi viðburður stjórnunar og mannauðsmála á Íslandi. Í tilefni Mannauðsdagsins fjallar Atvinnulífið um nýjar áherslur og framtíðina þessum málum tengdum.

Markaðs- og mannauðsfólk að tala saman

Arnar er meðal fyrirlesara á Mannauðsdeginum á föstudag, en þennan viðburð sóttu 800 manns í fyrra og þá var uppselt. Mannauðsdagurinn hefur verið haldinn frá árinu 2011 og er nú einn stærsti viðburður stjórnunar og mannauðsmála á Íslandi.

Yfirskrift fyrirlesturs Arnars er ,,Markaðssetning á störfum framtíðarinnar,“ enda starfar Arnar við markaðsmál dag frá degi.

„Það sem er að gerast svolítið hratt er að markaðsfræðin og mannauðsfræðin eru að tengjast meira en áður. Það er því fullt tilefni til þess að þessi tvö teymi innan fyrirtækja, sem í gegnum tíðina hafa kannski ekkert endilega verið mikið að vinna saman, fari fyrir alvöru að tala saman og móta stefnu um það hvernig vinnustaðurinn ætlar að tryggja sér hæfileikaríkt starfsfólk til framtíðar,“ útskýrir Arnar og bætir þó við að auðvitað eigi þetta markmið einnig við um það að viðhalda starfsfólki til lengri tíma.

Arnar segir samkeppni um gott fólk vera orðna það mikla að það að fara að byggja upp vinnustaði sem sterk vörumerki fyrir starfsfólk til framtíðar, sé einfaldlega eitthvað sem rannsóknir styðji að vinnustaðir þurfi að fara að huga betur að.

„Við heyrum stundum að því að fyrirtæki sem eru sterk vörumerki fá til sín mikið af umsóknum þegar störf eru auglýst hjá þeim. Ég nefni til dæmis Icelandair eða Símann. Þetta eru fyrirtæki sem eru sýnileg og sterk vörumerki í huga neytenda. Það sama á við um risafyrirtækin erlendis. Stórfyrirtæki eins og Google er til dæmis að fá til sín um þrjár milljónir umsækjenda á ári.“

Markmiðið sé þó ekki að fá sem flestar umsóknir, heldur að vinnustaðir séu að fá hæfileikaríkasta fólkið til þess að sækja um störfin.

„Aðdragandinn er hins vegar miklu lengri en sá sem aðeins nær til þess þegar starf er auglýst. Það hvernig fólk er að upplifa fyrirtækið sem vörumerki nær mun lengra aftur og væri bæði hægt að telja í mánuðum og árum. Þegar að því kemur að vinnustaður auglýsir laust starf til umsóknar, mátar fólk sig við starfið og vinnustaðinn miðað við þá ímynd sem það hefur á þeim vinnustað sem er að leita af fólki.“

En getur ekki verið hættulegt að vera með sterka markaðslega ásýnd sem vinnustaður ef innistæðan reynist síðan ekki fyrir hendi innanhús?

„Jú að sjálfsögðu,“ svarar Arnar og bætir við:

„Þess vegna er svo mikilvægt að mannauðs- og markaðsteymin fari að tala meira saman og vinna meira saman að markaðsmálum og stefnu. Því þarna liggja hagsmunirnir algjörlega saman. Því sama hver varan eða þjónustan er sem fyrirtækin eru að selja, er alltaf eitthvað fólk á bakvið fyrirtækið. Á endanum getur upplifun viðskiptavinarins á vörunni eða þjónustunni því staðið svolítið á því hvernig það upplifir starfsfólkið.“

Arnar segist hafa rýnt í þó nokkuð af rannsóknum þessu til stuðnings.

„Ánægður starfsmaður er líklegastur til að veita bestu þjónustuna. Þess vegna er það lykilatriði að vinnustaðurinn standi undir þeim væntingum sem búið er að byggja upp í markaðsvinnunni. Ef þessi innistæða er ekki fyrir hendi, eykst hættan á þjónustufalli sem þýðir að viðskiptavinurinn er einfaldlega ekki nógu ánægður með vöruna eða þjónustuna sem verið er að selja. Hagsmunirnir liggja því alveg saman í ráðningum annars vegar og árangri rekstursins hins vegar.“

Mælir með myndböndum um vinnustaði

Að sögn Arnars er stór hluti viðskiptavina Digido að herja á erlenda markaði eins og Bandríkjunum, Bretlandi, Kanada, Norðurlöndunum og fyrirtæki í Vestur Evrópu.

Alls staðar hefur virknin á LinkedIn verið að aukast það hratt og þar eru vinnustaðir að nýta sér auglýsingar LinkedIn til að byggja upp sína ásýnd sem vinnustaður.

Lengi vel var lítil virkni á LinkedIn því það var einfaldlega ekki mikið efni á miðlinum. 

Þetta hefur breyst og vinnustaðir eru farnir að nýta sér tækin og tólin sem þeir bjóða upp á í auglýsingum sem sinn aðal miðil þegar kemur að því að falast eftir hæfu fólki. 

Ég tel engar líkur á öðru en að notkun á LinkedIn muni springa út á Íslandi á næstu árum.

Í erindinu sínu á föstudaginn segist hann ætla að koma aðeins inn á þetta en eins líka að gefa ráðstefnugestum heilræði sem þeir geta nýtt sér strax að loknum fyrirlestri.

„Ég nefni sem dæmi myndbönd. Neytendur vilja fá efni til sín í myndbandsformi á meðan ráðningaauglýsingar eru mjög staðlaðar. Ég myndi því alltaf hvetja fyrirtæki til að skoða myndbandsgerð sem endurspeglar þá ásýnd og ímynd sem fyrirtækið vill hafa sem vinnustaður. Ekki aðeins að framleiða auglýsingaefni til að selja vörur og þjónustu.“

Þetta segir Arnar ekki alltaf þurfa að vera mjög flókið eða dýrt og meira að segja sé hægt að skoða hvaða auglýsingar virka best með einföldum A B prófunum. Sem þýðir að markaðsefni er þá búið til með smá áherslumun og síðan er það prófað á einhverjum afmörkuðum hópi, til dæmis á samfélagsmiðlum, hvort útgáfan er að virka sem best: A eða B.

„Það eru ýmsir íslenskir vinnustaðir farnir að vinna vel að þessum málum. Ég nefni sem dæmi Isavia. Það er auðvelt að sjá hvernig Isavia er farið að nýta sér markaðssetningu til að gefa fólki innsýn í það hvers konar vinnustaður Isavia er. Sem síðan skilar sér þegar Isavia er að auglýsa eftir fólki árlega, enda stór vinnustaður sem þarf reglulega að manna ný störf.“

Arnar segir rannsóknir sýna að vinnustaður sem nær að byggja sig upp sem sterkt vörumerki, nær ekki aðeins meiri árangri í starfsráðningum heldur einnig því að starfsmannavelta minnkar.

„Í fyrirlestrinum mínum fer ég því bæði inn á rannsóknir og fræðilegt efni en einnig praktísk heilræði sem gera fyrirtækjum kleift að skoða strax áherslureytingar í því hvernig þau sinna markaðsstarfinu og huga meira að því sem markaðssetningu fyrir mannaráðningar. Þetta er líka ákveðin breyting fyrir markaðsfólkið, sem til þessa hefur meira verið að horfa á vörur eða þjónustuúrval sem verið er að selja. Með aukinni samkeppni um starfsfólk eru þessi tvö svið hins vegar að krossast það mikið og þess vegna tel ég fulla ástæðu til að mannauðs- og markaðsfólk sameinist í auknum mæli; í samtali og vinnu.“