„Það skín af fólki þegar það er sátt með sig“

Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.

Hvað finnst þér skemmtilegast við tískuna?

Af minni upplifun er hún form tjáningar. Mín persónulega tíska fer eftir tímabilum og í hvernig hugarástandi ég er á hverju tímabili. 

Hver er uppáhalds flíkin þín og af hverju?

Buxurnar sem ég var í í Söngvakeppninni. Sniðið á þeim er að mínu mati fullkomið. Mér fannst orkan í þeim hentar mínum persónuleika og orku lagsins og mér fannst ég ekkert eðlilega flott í þeim.

Eyðirðu miklum tíma í að velja föt hverju sinni?

Alls ekki. Ég mætti í rauninni eyða meiri tíma í það. Það kemur fyrir að ég gleymi algjörlega að skipuleggja hvernig look ég vil hafa fyrir ákveðin tilefni og þá fer óþarfa orka í að stressa mig yfir að vera að því á seinustu stundu.

Hvernig myndirðu lýsa stílnum þínum?

Hann er svo breytilegur eftir hvernig mér líður og í hvaða aðstæðum ég er. Almennt séð myndi ég lýsa honum sem litríkum og gefur athyglissýkinni minni shoutout.

Hefur stíllinn þinn breyst mikið í gegnum tíðina og hvernig þá?

Á unglingsárunum gekk ég BARA í svörtum fötum og vildi hafa buxur eins þröngar og mögulegt var. Ég er 21 árs svo það er í rauninni alls ekki langt síðan þetta var. 

Um 18 ára aldur tók stíllinn minn hressilega U-beygju og ég fór að hugsa meira um samsetningar á litum og sniðum. Hann hefur haldist nokkuð stabíll frá því.

Hvaðan sækirðu innblástur í tískunni?

Í mínum augum eru bestu vinkonur mínar alltaf með lookin sín á lás og ég verð fyrir miklum innblæstri frá þeim. Annars held ég að ég verði ómeðvitað fyrir innblæstri frá flestum sem ég lít upp til á einhvern máta.

Ertu með einhver boð og bönn þegar það kemur að klæðaburði?

Eina bannið mitt er föt sem mér líður ekki vel í.

Hver er eftirminnilegasta flík sem þú hefur klæðst og af hverju?

Ætli það sé ekki kjóllinn sem ég var í á útskriftardaginn minn. Ég eyddi svo galið miklum tíma í að reyna að panta hann því hann var ekki til í minni stærð en ég manifestaði svo harkalega að ég ætlaði að vera í honum í minni stærð á stóra deginum, sem gerðist svo.

Býrðu yfir einhverju góðu ráði þegar það kemur að tísku?

Punkturinn yfir i-ið er að líða vel í því sem þú ert. Það skín af fólki þegar það er sátt með sig.

Hér má fylgjast með Diljá Pétursdóttur á samfélagsmiðlinum Instagram.