Co­vid eitt það besta sem kom fyrir ferilinn

Hér má sjá þáttinn:

Engin mörk og allt er leyfilegt

Sunna Björk hefur verið að gera öfluga hluti í förðunarheiminum undanfarin ár en sköpunargleðin kviknaði snemma hjá henni og átti förðun fljótt hjarta hennar.

„Förðun fyrir mér er algjört sköpunar- og tjáningarfrelsi. Það er algjör hamingja og leið til þess að leika sér. Ég verð að viðurkenna að ég horfi mikið á raunveruleikaþættina Rupaul's Drag Race og það hefur mótað mig mikið sem förðunarfræðing. 

Að sjá hvernig förðun hefur engin mörk, allt er leyfilegt og það getur verið svo rosalega mikil tjáning í förðun. Miklu dýpri en bara: „Ég er að gera mig sæta“, sem á líka alveg rétt á sér. En það er alltaf eitthvað meira á bak við það finnst mér.“

Flúði heim með ekkert förðunardót

Sunna Björk hefur unnið mikið með tónlistarkonunni Björk Guðmundsdóttir og hófst það samstarf í miðjum Covid faraldri. Í raun má segja að ótal mörg tækifæri hafi komið til Sunnu Bjarkar í faraldrinum.

„Ég bjó í París rétt fyrir Covid og ég endaði með því að flýja borgina. Ég skildi bara allt dótið mitt eftir og þar á meðal allar förðunarvörurnar mínar. Svo fæ ég tölvupóst þar sem ég er spurð hvort ég sé laus til að farða Björk fyrir verkefni. Og ég sagði bara: Já, ég er laus! Með ekkert förðunar-kit,“ segir Sunna Björk og hlær.

„Þannig að ég fór bara í Hagkaup og keypti allt sem ég gat fundið og bjó til eitthvað kit á núll einni.“

Hún segir að í kjölfarið á þessu verkefni hafi byrjað mjög fallegt samstarf við Björk.

„Það er búið að vera svo mikill lærdómur að vera í þessu verkefni með henni og teyminu hennar. Þau eru öll svo yndisleg, maður tekur það eiginlega mest úr öllu. Hvað gott fólk skiptir öllu máli.“

Á svipuðum tíma var Ísland vinsæll áfangastaður fyrir ýmsa tískurisa sem voru dugleg að heyra í Sunnu Björk.

„Það byrjuðu svo mörg tískutímarit að koma og mynda á Íslandi. Þannig að þetta var pínu blessing in disguise, að hafa þurft að fara frá París.“

Þættirnir KÚNST með Dóru Júlíu rannsaka hinar ýmsu víddir listsköpunar, ólíka listmiðla og sköpunargleði hjá íslenskum samtíma listamönnum ásamt því að fá að skyggnast bak við tjöldin og heyra um persónulegt líf þeirra.