Bar­bie tekju­hæst og vin­sælust á Ís­landi í fyrra

Jafnframt var mesta aðsóknin á Barbie en alls lögðu yfir 80 þúsund kvikmyndahúsagestir leið sína í kvikmyndhús landsins til að sjá leiknu útgáfu leikstjórans Gretu Gerwig um leikfangadúkkuna Barbie. Þetta kemur fram í tilkynningu frá FRISK, Félagi rétthafa í sjónvarpi og kvikmyndum.

Í öðru sæti yfir tekjuhæstu kvikmyndir ársins var það íslenska kvikmyndin Villibráð í leikstjórn Elsu Maríu Jakobsdóttur. Kvikmyndin þénaði tæpar 115 milljónir króna en yfir 56.000 manns fóru í kvikmyndahús „til að sjá vinahóp í Vesturbænum fara í stórhættulegan samkvæmisleik.“

Í þriðja sæti listans var svo stórmynd leikstjórans Christopher Nolan, Oppenheimer. Kvikmyndin var eins og frægt er orðið frumsýnd sama dag og Barbie og var yfirleitt vísað til þeirra saman sem Barbenheimer. Kvikmyndin segir frá vísindamanninum J. Robert Oppenheimer sem kom að því að hanna atómsprengjuna. Oppenheimer þénaði yfir 76 milljónir króna hérlendis ásamt því að taka á móti rúmlega 40 þúsund manns.

Fleiri sáu íslensk verk í fyrra en árið áður

Ásamt Villibráð rötuðu tvær aðrar íslenskar kvikmyndir i inn á listann yfir tuttugu tekjuhæstu kvikmyndir ársins en ellefu íslensk verk voru sýnd í kvikmyndahúsum á árinu. Kvikmyndin Kuldi, sem er byggð á metsölubók Yrsu Sigurðardóttur og í leikstjórn Erlings Óttars Thoroddsen, komst í 5. sæti aðsóknarlistans með yfir 61 milljónir króna í tekjur en tæplega 30 þúsund manns sáu myndina í kvikmyndahúsum.

Rétt á eftir Kulda og í 6. sæti aðsóknarlistans var kvikmyndin Napóleonsskjölin. Kvikmyndin í leikstjórn Óskars Þórs Axelssonar er byggð á metsölubók Arnalds Indriðasonar og þénaði kvikmyndin tæpar 60 milljónir króna þar sem yfir 29 þúsund manns sáu myndina. Fleiri kvikmyndahúsagestir sáu íslensk verk í kvikmyndahúsum þetta árið samanborið við árið áður.

Heildartekjur af íslenskum verkum á árinu voru rúmar 285 milljónir króna samanborið við rúmar 127 milljónir króna árið 2022.

Lista yfir tuttugu vinsælustu kvikmyndirnar á árinu 2023 má sjá hér að neðan. Fram kemur í tilkynningu FRISK að vinsældum mynda er ávallt raðað eftir tekjum en ekki aðsókn. Þetta er gert til þess að hlutfall boðsmiða eða afsláttarmiða í umferð hafi ekki áhrif á uppröðun kvikmynda.