„Það mikil­vægasta er að vera trúr sjálfum sér“

Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.

Hvað finnst þér skemmtilegast við tískuna?

Mér finnst skemmtilegast við tísku hvað hún býður upp á mikinn fjölbreytileika, og hvað hver og ein manneskja getur tjáð sig með sínum persónulega stíl og klætt sig í því sem viðkomandi líður best í. Þó að þér finnist einhver litur eða flík ekki fara þér gæti það verið fullkomið á öðrum!

Hver er uppáhalds flíkin þín og af hverju?

Ég fékk vintage bleika Balenciaga tösku í afmælisgjöf fyrir nokkrum árum og hún hefur verið í algjöru uppáhaldi síðan. Ég klæðist mikið svörtum eða hlutlausum flíkum og finnst því svo æðislegt að geta bætt inn smá lit með sætri statement tösku og hver elskar ekki bleikan?

Eyðirðu miklum tíma í að velja föt hverju sinni?

Það fer talsverður tími í að ákveða föt hjá mér. Ég dýrkaði myndina Clueless og forritið sem Cher notaði til að ákveða fötin sín þegar ég var yngri. Ég fann síðan fyrir nokkrum árum forritið Capsule - Wardrobe sem leyfir manni að setja inn allar flíkurnar sínar og ákveða þannig fötin sem maður vill klæðast.

Það hjálpar mér talsvert á daginn að hafa „fataskápinn“ í einu litlu forriti og uppáhalds outfittin á sama stað. Það flýtir verulega fyrir að fá hugmyndir með því að rúlla í gegnum það. Að auki elska ég að setja saman fötin mín þar og prófa að máta nýja hluti saman.

Hvernig myndirðu lýsa stílnum þínum?

Almennt minimalískur, stílhreinn og afslappaður en stundum finnst mér samt mjög gaman að vera prinsessa í glimmer og glamúr. 

Það fer aðallega eftir hvernig skapi ég er í þegar ég vel fötin mín. Mér líður samt alltaf lang best í hlutlausum litum og kjólum hvort sem það er þægilegur einfaldur peysukjóll eða síðkjóll.

Hefur stíllinn þinn breyst mikið í gegnum tíðina og hvernig þá?

Já að sjálfsögðu hefur stíllinn minn þróast í gegnum tíðina, enda er svo margt sem hefur áhrif á persónulegan stíl hvers og eins. 

Ég hef prófað mig áfram í gegnum marga stíla og tímabil. Það sem hefur breyst mest samt er líklegast það að áður fyrr hélt ég alltaf að það væri svo mikilvægt að passa inn og vera eins og aðrir, draga ekki of mikla athygli að sér.

Ég keypti jafnvel flíkur sem mér fannst flottar en þorði svo varla að klæðast þeim. Ég hef samt alltaf verið ákveðin með það hverju ég klæðist, alveg frá barnæsku. 

Með árunum hef ég samt áttað mig betur á því að það skiptir engu máli hvernig aðrir klæða sig og það mikilvægasta er að vera trúr sjálfum sér! Það var þá sem ég fór að klæðast meira fötum sem voru ég.

Nýturðu þess að klæða þig upp?

Ég elska að klæða mig upp fínt og hugsa reglulega um tilvitnunina frá Audrey Hepburn: „Life is a party, dress like it“. Mér líður alltaf vel ef ég er sátt með outfittið mitt.

Hvaðan sækirðu innblástur í tískunni?

Ég sæki innblástur frá mörgum stöðum. Hvort sem það er samfélagsmiðlum, sérstaklega pinterest, fólk sem ég sé úti á götu, hugmyndir úr tímaritum eða jafnvel frá rauða dreglinum. Einnig verð ég að játa að ég dragi smá innblástur frá mömmu og ömmu.

Ertu með einhver boð og bönn þegar það kemur að klæðaburði?

Eins og ég nefndi áðan er tíska svo fjölbreytileg og smekkur eða skoðanir varðandi hvað tíska er getur verið mjög mismunandi. Ég trúi því lítið á að það séu einhver boð eða bönn þegar kemur að klæðaburði. Ef þér líður vel í fötunum kýldu á það!

Hver er eftirminnilegasta flík sem þú hefur klæðst og af hverju?

Eftirminnanlegasta flíkin sem ég hef klæðst er líklegast síðkjóllinn minn sem ég notaði í Ungfrú Ísland. 

Það fór mikil vinna og tími í að finna rétta kjólinn, eitthvað sem ég væri pottþétt á og myndi líða vel í, en ég endaði síðan á að kaupa kjól og steina hann allan upp með mömmu minni. 

Ég dýrka að steina flíkur þegar mér finnst vanta aðeins meiri glamúr og gera flíkina á sama tíma persónulegri.

Býrðu yfir einhverju góðu ráði þegar það kemur að tísku?

Að eiga vandaðar og góðar grunnflíkur, ég er hrifnust af því að kaupa góðar flíkur sem endast. Svo er alltaf hægt að stílisera upp outfit með fallegum hælum, skarti og tösku.

Það má svo ekki gleyma því að stundum er gaman að koma hlutum áfram til annarra í gegnum hringrásarhagkerfið, sérstaklega þegar ég þarf nauðsynlega að rýma til í fataskápnum.

Hér má fylgjast með Helenu á samfélagsmiðlinum Instagram.