Um­ræða um feðra­veldi og karl­rembu skekur djassbransann

Þetta skrifar Sunna Gunnlaugsdóttir djasspíanisti í Facebook-færslu þar sem hún gerir karlrembu og feðraveldi íslensku djasssenunnar að umtalsefni sínu.

Að vera lítill karl er titill færslu Sunnu. Annars vegar tekur hún fyrir Jazzhátíð Reykjavíkur, bæði þegar hún gagnrýndi fyrirkomulag hátíðarinnar og þegar hún sat í stjórn hennar, og hins vegar samskipti við tónlistarmann. 

Þessi tónlistarmaður er ekki nafngreindur í færslu Sunnu, en Einar Scheving trommari hefur birt færslu á sinni Facebook-síðu þar sem hann svarar fyrir sig og sakar hana um rógburð.

„Vöruð við að stíga á tærnar á tilkörlunum“

Til að byrja með fjallar Sunna um Jazzhátíð Reykjavíkur, bæði þegar hún gagnrýndi fyrirkomulag hátíðarinnar og þegar hún sat í stjórn hennar. Að sögn Sunnu féllu breytingar á hátíðinni, sem munu hafa verið gerðar fyrir hátíðina 2015 og snerust meðal annars um að flytjendur þyrftu að sækja um að koma fram á hátíðinni, ekki í kramið hjá sumum „tilkörlum“ sem álitu sjálfa sig eigendur hátíðarinnar.

„Ég var vöruð við að stíga á tærnar á tilkörlunum og mér kurteisislega bent á að „brosa meira og ekki segja nei við þessa menn“. Það var öskrað á mig þegar menn fengu ekki sínu fram,“ segir hún um veru sína í stjórn hátíðarinnar. 

Þá segist hún hafa heyrt af því að það færi fyrir brjóstið á sumum að hátíðinni gengi vel fjárhagslega, og þá hafi henni verið eignaðar skoðanir um að hún vildi ekki fá hinn eða þennan flytjanda til að spila.

„Þeir eru nokkrir, alls ekki allir, en nógu margir til að eitra út frá sér. Frekjan, eigingirnin og allt illa umtalið. Maður lifandi. Jazzhátíð Reykjavíkur er helsta afl jazzsamfélagsins en samt er eins og menn leggi sig fram um að grafa undan henni, hliðarverðirnir sem koma í veg fyrir að nokkuð geti dafnað því þeir óttast að vera skildir eftir. Svo eru það hinir sem ekkert segja af því að þeir óttast að missa sinn hlut. En vitið þið, illt gerir engum gott,“ skrifar Sunna.

Þess má geta að í svargrein Einars segist hann ekki setja spurningamerki við þessa upplifun hennar af djassbransanum á Íslandi. Sjálfur segist hann ekki hafa upplifað karlrembu meðal djasstónlistarmanna á Íslandi, en hann segir að eflaust megi finna hana hjá þeim líkt og annars staðar.

„Ég hef ekki enn jafnað mig á karlrembunni“

Seinni hluti færslu Sunnu varðar samskipti við Einar, sem líkt og áður segir er ekki nafngreindur í færslunni. Hún hafi fengið skilaboð frá honum vegna þess að honum hafði borist til eyrna að hún bæði fólk að ráða hann ekki í bönd á tónleikaseríum þar sem hún kæmi að. Hann vildi fá útskýringu á því.

Í færslu sinni svarar Sunna Einari. Hún segir að þegar hún var að bóka fyrir hátíðina Freyjufest sem var í Hörpu í janúar í fyrra hafi hún sagt í einkasamtali við annan einstakling að hún vildi ekki bóka hann þar sem hún sagðist ekki vera búin að jafna sig á karlrembunni í kringum Jazzhátíð Reykjavíkur.

„Þetta er bara dagsatt. Ég hef ekki enn jafnað mig á karlrembunni og forréttindafrekjunni í kringum þig og þína. Mér er ekki illa við þig þó mér hafi misboðið framkoma þín og að mig langi ekki að vera í návist þinni og langaði ekki að þú kæmir sem afleysingamaður á hátíðina sem ég bjó til og fjármagnaði. Þér finnst ég ekki hafa rétt á að velja fólkið sem ég greiði laun en mér finnst eðlilegt að ég geri það. Þá er ég að tala um verkefni sem ég fjármagna en ekki sjálfseignarfélag eins og Jazzhátíð Reykjavíkur. Ég mun aldrei vísvitandi fara niður á þetta plan að grafa undan tækifærum annara.“

Segist alltaf sýnt Sunnu kurteisi

Sunna birti færslu sína um hálftvöleytið í dag, en rétt fyrir sjö í kvöld birti Einar svargrein. Hann segir að líklega hefðu flestir almannatenglar sagt tilgangslaust að rita slíka grein, en þar sem færsla Sunnu hafi vakið athygli og hlotið undirtektir frá samstarfsfólki og vinum Einars sjái hann sig knúinn til að svara fyrir sig.

„Ég hef alltaf talað við Sunnu eins og hverja aðra manneskju, enda fer ég ekki í manngreinarálít í samskiptum mínum við fólk, burt séð frá kyni. Ég hef alltaf sýnt henni kurteisi, jafnvel þrátt fyrir að hún hafi lengi sýnt mér kaldlyndi sem ég hef hreinlega aldrei botnað í. Rétt eins og Sunna bendir á í sinni færslu þá er ekkert pláss fyrir leiðindi í okkar litla bransa, en einu leiðindin milli okkar Sunnu eru ekki frá mér komin og þykir mér leitt að henni skuli augljóslega vera illa við mig. Ég stjórna hins vegar ekki öðru fólki og hef því hingað til leitt þetta hjá mér,“ skrifar Einar.

Um þessi samskipti hans og Sunnu segir hann að þau hafi lítið talast við undanfarið, en þegar hann hafi heyrt að hún hafi beðið listamann um að ráða hann ekki í hljómsveit hafi hann ákveðið að spyrja hvort henni væri illa við sig.

„Hún ræður eðlilega hverjir koma fram á þeim tónleikum sem hún skipuleggur, en mér brá eðlilega að heyra að hún hefði beðið viðkomandi listamann sérstaklega að ráða mig ekki. Þegar ég frétti þetta þá að sjálfsögðu spurði ég Sunnu út í þetta og hvort henni væri eitthvað illa við mig,“ segir Einar.

„Hún sagðist mundu svara mér og beið ég því eftir útskýringum. Þær komu aldrei fyrr en ég rakst á þessa færslu Sunnu, þar sem hún reynir að spyrða mig við einhverja landlæga karlrembu innan jazzgeirans. Það er gjörsamlega óásættanlegur rógburður, enda eins og áður sagði þá fyrirlít ég þann heim sem hún reynir að spyrða við mig.“