Rukkaður um 2800 króna auka­gjald í Reynisfjöru

Hann sagði frá málinu í Bítinu. Hann segist hafa fengið ættingja erlendis frá í heimsókn til Íslands og þeir hafi fengið bíl hans lánaðan til að ferðast um Suðurlandið. Í heildina hafi þeir greitt bílstæðagjald á fjórum stöðum, sem Adolf þykir í sjálfu sér leiðinlegt. 

Eftir að ættingjarnir voru farnir heim hafi hann komið auga á rukkun í heimabankanum sínum upp á 2800 krónur, frá fyrirtæki sem heitir MyParking ehf, en Adolf hóf söguna á að kalla fyrirtækið „glæpafyrirtæki“.

„Og það kemur ekkert fram fyrir hvað,“ segir Adolf um rukkunina. Hann hafi reynt að verða sér úti um símanúmer fyrirtækisins án árangurs. Eftir að hafa skráð sig inn rafrænt á vefsíðu MyParking hafi hann loksins fundið síðu þar sem hann gat sent inn fyrirspurn.

„Þar er mér tjáð að þetta sé fyrir að leggja í Reynisfjöru. Og ég hef samband við systurson minn og spyr hvort þau hefðu ekki borgað þar. Jújú, þau borguðu þar eins og annars staðar,“ segir Adolf og að hann hafi fengið skjáskot af bankayfirliti þar sem kom fram að þúsund krónur hefðu verið greiddar fyrir stæðið. Skjáskotið hafi hann sent áleiðis sér til stuðnings. 

„Fæ þá síðan svar um það að þau hafi greitt fyrir venjulegan fimm manna bíl en bíllinn minn sé skráður sjö manna.“

Adolf hafi útskýrt að bíllinn sé gamall Land Cruiser jeppi sem hægt sé að setja aukasæti í, en engin aukasæti hafi verið í bílnum í mörg ár. MyParking hafi ekki fallist á þær útskýringar og sagt að bíllinn væri samt skráður sjö manna. 

Gjaldið kosti þúsund krónur

„Ég velti þá fyrir mér, hvað með ferðamenn sem leigja sér bíla? Stór hluti af jeppunum sem er verið að leigja þeim eru einmitt svona útbúnir, þannig að það sé hægt að troða sjö sætum í hann ef á þarf að halda. Haldið þið að þetta fólk viti að bíllinn sé þannig skráður?“

Adolf bendir síðan á að á heimasíðu Parka, sem rukkar inn á bílastæðin, kemur fram að gjald fyrir sex til níu manna bíl við Reynisfjöru kosti þúsund krónur. Á síðunni stendur að á svæði P2 kosti slíkt stæði þúsund krónur en á stæði P1 1300 krónur. Þá segir að miðað sé við að bíllinn sé farinn úr stæðinu eftir þrjár klukkustundir.

„Hann borgaði eitt þúsund krónur og þeir eru að rukka mig um 2800 krónur, aukalega, af því að hann hafði ekki borgað fyrir rétta stærð af bíl. Samkvæmt þeirra eigin gjaldskrá á netinu, þá borgaði hann rétt fyrir það.“

Kaos á bílastæðinu

Þá snýr Adolf sér að aðstæðunum á bílastæðinu við Reynisfjöru. 

„Þetta sem þú ert að borga fyrir þarna, þetta er malarplan, ómerkt, og enginn starfsmaður sem sér um neitt hérna,“ segir Adolf og vekur athygli á að við Seljalandsfoss sé merkt plan, starfsmaður sem sér til þess að ferðamenn leggi í rétt stæði. 

„Ef þú kemur í Reynisfjöru um miðjan dag, er þetta bara kaos.“

Samkvæmt ferðamannasíðum kostar 800 krónur að leggja við Seljalandsfoss í sólarhring.

Adolf gagnrýnir að ekki sé samræmi milli Parka, sem er þjónustuaðili fyrir eigandann á svæðinu, og MyParking, sem sér um að innheimta gjöldin. 

„Og ég gjörsamlega neita að borga eitthvað álag sem er skellt á þetta.“

Og kemstu upp með það?

„Það á eftir að koma í ljós. En málið er, hvernig blasir þetta við ferðamönnum sem koma hingað og fá síðan einhverjar svona rukkanir í gegn um bílaleiguna sína.“

Bílaleigur rukki í ofanálag

Þá lendi ferðamenn í öðrum vandræðum, því langflestar bílaleigur áframsenda þær rukkanir sem þær fá eftir bílnúmeri með tilheyrandi kostnaði sem þeir leggja á, sem séu einhverjir þúsundkallar.

„Þannig að ferðamaður sem leigir sér bíl og lendir í þessu fær, þó hann hafi borgað þúsundkall fyrir að leggja þarna, rukkun upp á fleiri þúsundkalla, sem hann getur nánast ekkert gert við,“ segir Adolf.

Hann segir of marga í ferðaþjónustunni stefna á það eitt að okra eins mikið og hægt sé á ferðamönnum. 

„Við erum að verðleggja okkur út af markaðinum og pissa í skóinn.“

Loks segir hann sífellt færri ferðamenn í leiðsöguhópum hans borða á veitingastöðum hótela og sífellt fleiri versla sér nesti og borða uppi á hótelherbergi. 

„Ég er núna með farþega í hringferð sem jafnvel borða nánast aldrei með hópnum.“