Uppgjörið: KA - Valur 1-0 | Viðar Örn skemmdi partýið hjá nýja þjálfarnum

Árni Gísli Magnússon skrifar 6. ágúst 2024 18:31

KA sigraði Val 1-0 í 17. umferð Bestu deildar karla á Greifavellinum fyrr í kvöld í fyrsta leik Srdjan Tufegzdic sem þjálfara Vals.

Viðar Örn Kjartansson skoraði eina mark leiksins undir lok fyrri hálfleiks. Norðanmenn eru nú ósigraðir í 8 leikjum í röð í deild og bikar og styttist bilið í efri hlutann óðum þó liðið sitji enn í áttunda sæti. Valur er áfram í þriðja sæti en draumar um Íslandsmeistaratitlinn hafa dvínað verulega.

Heimamenn voru nálægt því að komast yfir strax á annarri mínútu þegar Daníel Hafsteinsson fékk boltann skyndilega við markteig Valsmanna en setti boltann yfir.

Eftir rúmar 20 mínútur voru Valsmenn óheppnir að ná ekki forystunni þegar Tryggvi Hrafn átti frábært skot sem Steinþór Már varði meistaralega og Jónatan Ingi setti svo boltann yfir úr kjörstöðu inn við markteig.

Örfáum mínútum síðar átti Tryggvi Hrafn aftur skot en nú í varnarmann og Bjarni Mark fékk frákastið og læt vaða fyrir utan teig en Steinþór Már varði vel.

Eftir þetta róaðist leikurinn mjög mikið og lítið sem ekkert markvert gerðist þangað til komið var rétt fram yfir venjulegan leiktíma. Valsmenn áttu þá slaka hreinsun úr teignum og Daníel Hafsteinsson tók skotið í fyrsta sem rataði beint á Viðar Örn, sem var á leið úr rangstöðunni, og Viðar stýrði boltanum laglega í netið og tryggði KA forystu inn í síðari hálfleik.

Valsliðið kom ákveðnara út í síðari hálfleik en færin voru að skornum skammti beggja vegna. Á 59. mínútu dró til tíðinda en Viðar Örn fékk þá hárfína sendingu inn fyrir og Frederik Schram, markaður Vals, kom á fleygiferð á móti honum en Viðar tók boltann til vinstri fram hjá Fredrik sem sparkaði Viðar niður rétt utan við vítateig. Viðar átti í raun bara eftir að setja boltann í tómt markið og fór því rauða spjaldið réttilega á loft og Valsmenn einum færri.

Ögmundur Kristinsson kom inn á í markið, ekki slæmt að eiga slíkan markmann á bekknum. Hallgrímur Mar tók aukaspyrnuna og þrumaði boltanum í slána. KA menn óheppnir að vera ekki komnir tveimur mörkum yfir.

Valsmenn héldu meira í boltann út leikinn þrátt fyrir að vera færri en náðu ekki að skapa sér mikið gegn skipulögðu KA liði sem lagðist aðeins til baka restina af leiknum.

Dýrmætur 1-0 sigur KA staðreynd og bjartari tímar virðast vera framundan á brekkunni.

Atvik leiksins

Markið hjá Viðari Erni. Alvöru framherja mark þar sem hann er rétt svo kominn úr rangstöðunni og rekur svo löppina í boltann og stýrir honum í netið.

Stjörnur og skúrkar

Viðar Örn átti mjög góðan leik í dag þangað til hann fór af velli vegna meiðsla. Skoraði sigurmarkið og setti boltann aftur í netið en var dæmdur rangstæður.

Jakob Snær hljóp að venju eins og óður maður og skilaði frábærri vinnu í vörn sem sókn.

Aftasta lína KA á skilið hrós í heild sinni og tek ég þar Hans Viktor Guðmundsson út fyrir sviga en hann átti virkilega agaða frammistöðu.

Tryggvi Hrafn var manna frískastur hjá Val og í raun óheppinn að skora ekki.

Það leyndi sér ekki að Gylfi Þór Sigurðsson gekk ekki heill til skógar í dag en hann komst alltof lítið í boltann

Frederik Schram verður að taka skúrkstitilinn á sig eftir að hafa fengið rautt spjald. Ögmundur Kristinsson kom inn í hans stað og mun því byrja næsta leik þar sem Frederik tekur út bann og er þetta því kjörið tækifæri fyrir hann til að hirða byrjunarliðssætið en Frederik yfirgefur Val eftir tímabilið.