15 ís­lenskar þátta­raðir á Stöð 2 í haust

Þóra Björg Clausen, dagskrárstjóri Stöðvar 2 segir fjölbreytni einkenna dagskrána.

„Við frumsýnum þrjár leiknar þáttaraðir á haustmánuðum sem koma sannarlega úr sitt hvorri áttinni. Svörtu sandar snúa aftur í október en við höldum áfram sögunni 15 mánuðum eftir atburði síðustu þáttaraðar. Þegar hræðilegir atburðir gerast aftur í þorpinu er nokkuð ljóst að ofbeldi, vanræksla og morð í fortíðinni minnir þorpsbúa á að illska nærist á þöggun. Þau Baldvin Z, Álfheiður Marta Kjartansdóttir og Erlendur Sveinsson leikstýra þessum mögnuðu þáttum og Aldís Amah, Lára Jóhanna Jónsdóttir, Pálmi Gestsson, Aron Már Ólafsson og Ævar Þór Benediktsson eru á meðal aðalleikara.“

Saga Garðars og Steindi Jr. kitla hláturtaugarnar

Um jólin verða sketsaþættirnir Draumahöllin frumsýndir en Steindi Jr., Saga Garðars og Magnús Leifsson skrifuðu þessa frábæru þætti. Þegar þetta fólk kemur saman er heldur betur von á góðu en þessir þættir verða engu öðru líkir,“

„Þegar sketsaþættir eru annarsvegar þá er svo gaman að leyfa hverju atriði fyrir sig að koma sér skemmtilega á óvart og kitla hláturtaugarnar á mismunandi hátt. Það er óhætt að leyfa sér að hlakka til þegar þessir þættir hefjast hjá okkur."

Tveir vinir kaupa subbulegan bar

„En við hefjum þó leika á gamanseríunni Flamingo bar þar sem við fylgjumst með vinunum Tinnu og Bjarka sem fjárfesta í subbulega barnum Flamingo og reyna að snúa rekstrinum við með gamansömum afleiðingum. Seríuna prýða margir af okkar bestu upprennandi gamanleikurum svo það er óhætt að segja að von er á góðu."

„Og talandi um gaman þá verðum við með tvo glænýja gamanþætti á föstudögum í vetur."

Heimsækja verstu áfangastaði heims

„Í nýjum ferðaþætti ferðast Steindi og Dóri DNA til vinsælustu áfangastaða íslenskra ferðalanga en í stað þess að leita að lífsins þægindum á ferðalaginu prófa þeir þess í stað allt það óvenjulegast og jafnvel versta sem áfangastaðurinn hefur upp á að bjóða.

Auðunn Blöndal mun síðan frumsýna nýjan skemmtiþátt, Bannað að hlæja, þar sem hann býður góðum vinum í matarboð. Í boðinu má enginn hlæja en markmiðið leiksins er hins vegar að koma öðrum til að hlæja. Hversu langt eru gestirnir tilbúnir að ganga til að koma hinum til að hlæja?“

Eftirmál á skjánum

Einir vinsælustu hlaðvarpsþættir landsins, Eftirmál, munu birtast landsmönnum á skjánum í haust. Nadine Yaghi og Þórhildur Þorkelsdóttir stýra þættinum en þær hafa einstakt lag á því að fjalla á skemmtilegan og áhugaverðan hátt um viðfangsefni sín og glæða þau nýju lífi í sjónvarpsþáttunum.

Gamlir vinir snúa aftur

Hinn eini sanni Gulli Helga snýr aftur á skjáinn með þættina sína Gulli byggir. Í þessari þáttaröð fylgir Gulli ekki bara eftir verkefnum hér á landi heldur fer líka út fyrir landssteinana. Það verður spennandi að venju að sjá hver útkoman verður en ekki síður að fylgjast með ferlinu sjálfu.

Auðunn Blöndal snýr aftur með Edduverðlaunaþættina Tónlistarmennirnir okkar og í þessari þáttaröð fylgir hann Birni Jörundi, Svölu Björgvins, Herberti Guðmunds, Lóu Hjálmtýsdóttur, Páli Óskari og Bríeti eftir.

Skemmti- og spurningaþátturinn Kviss með Birni Braga snýr aftur í byrjun september og árið verður síðan gert upp í Kviss ársins sem sló heldur betur í gegn í fyrra. Þetta er fimmti veturinn sem Kviss er á dagskrá Stöðvar 2 en þættirnir hafa svo sannarlega slegið í gegn enda fer þarna saman einstök blanda af skemmtun og spennu.

Heimildaþættir og raunveruleiki

Heimir Karlsson snýr aftur með þættina Dýraspítalinn en þar kynnist hann gæludýrum og eigendum þeirra. Það getur oft tekið á þegar bestu vinir mannsins þurfa að leita til læknis en í þáttunum fáum við einstaka innsýn í þennan heim. 

Þá snýr vinkonuhópurinn LXS aftur og gefur okkur innsýn í líf, störf og ferðalög þeirra vinkvenna.

Kristján Már frumsýnir nýju þáttaröðina Flugþjóðin en í þessum fræðandi þáttum er flugsaga Íslendinga rakin en fáar þjóðir þurfa að reiða sig jafn mikið á flugsamgöngur og við Íslendingar á eyjunni okkar hér í Norður Atlantshafi.

Kaninn eru fróðlegir þættir um bandaríska körfuboltamenn sem fluttu hingað til lands á níunda og tíunda áratugnum þegar tíðarandinn var aðeins annar hér landi og þótti koma þeirra því ansi merkileg. Þættirnir verða sýndir á Stöð 2 og Stöð 2 Sport í nóvember.

„Eins og sjá má þá ættu allir að geta fundið sér eitthvað innlent efni við hæfi á Stöð 2 í haust en einnig verður fjöldi erlendra þáttaraða frumsýndar í haust og skemmtileg kvikmyndaþemu á laugardögum framundan t.d. Jurassic Park myndirnar, Hrekkjavökumyndir, Harry Potter og svo jólamyndirnar góðu þegar þar að kemur. Og allt saman að sjálfsögðu aðgengilegt á streymisveitunni Stöð 2+ þar sem finna má nýtt efni í bland við gullmola Stöðvar 2 í gegnum tíðina," segir Þóra.