Aníta og Sigrún Guðný hafa ferðast víða um heiminn síðastliðin ár til þess að sérvelja vörur fyrir verslun þeirra og vefverslun. Þær byrjuðu á að opna svokallaða pop-up verslun en eru nú búnar að opna Mamma Mia Vintage á Bergstaðastræti 2 samhliða vefversluninni.
„Við kynntust úti í Mílanó þar sem við vorum báðar í námi. Við vorum mikið að ferðast um og fara á markaði að „thrifta“ eða finna notaðar flíkur og þannig byrjaði Mamma Mia í rauninni.
Okkur fannst vanta nytjaverslun (e. vintage) með sérvöldum vörum hérna heima þannig að við ákváðum bara að fara „all in“ í þetta og héldum okkar fyrsta pop-up síðasta sumar.“
Þær segja að reksturinn hafi í kjölfarið vaxið hratt og gengið vel.
„Tíska er eitthvað sem við höfum báðar alltaf haft áhuga á og það hefur bara aukist. Við tölum oft um það hvað við vorum með allt öðruvísi fatastíl áður en við kynntumst og byrjuðum með Mamma Mia.
Núna er stíllinn okkar búinn að blandast einhvern veginn saman og við báðar fengið innblástur frá hvor annarri. Það er mögulega vegna þess að við eigum núna sameiginlegan fataskáp,“ segja þær kímnar og bæta við:
„Tíska hefur alltaf verið stór partur af okkar lífi og alltaf verið draumur að starfa á einhvern hátt í tískuheiminum.
Við deilum einnig þeim áhuga á því að taka ljósmyndir og stílisera fyrir myndatökur, það er eitthvað hefur látið vörumerkið okkar Mamma Mia Vintage skera sig úr og við gerum hlutina á einstakan hátt,“ segja skvísurnar. Þær segjast sérstaklega hrifnar af pelsum og öðru slíku og eru duglegar að rokka hinar ýmsu yfirhafnir.
„Við viljum að fólk geti verslað einstakar flíkur sem eru að eignast nýtt líf. Helsta markmið okkar er að hver sem er getur komið í verslun okkar og fundið sér fallega flík,“ segja þær.
Hér má sjá myndir frá tískuteitinu:
