Val­geir sár og Bubbi og Bó hneykslaðir

Í Facebook-status sem vakið hefur mikla athygli segir Valgeir af tölvupósti sem hann ritaði Dægurflugunni, sem annast framkvæmd á téðum heiðurstónleikum sem til stendur að halda á sunnudagskvöldið í Hörpu.

Auglýsingu fyrir tónleikana má sjá að neðan:

Vísir ræddi við Valgeir þar sem hann var á ferð ásamt Ástu Ragnarsdóttur eiginkonu sinni og þar sagðist hann ekki hafa nokkurn áhuga á því að sitja uppstillur í forsetastúkunni, eins og upp var lagt með.

„Ég hef engan áhuga á að vera í forsetastúkunni eins og páfagaukur,“ segir Valgeir við Vísi.

Í bréfinu sem stílað er á Einar Ólaf Speight kemur fram stæk óánægja Valgeirs með hvernig staðið er að tónleikunum, sem honum sé nú boðið á, geti ekki hafa farið fram hjá sér. Hann reikni með að Jón Ólafsson sé hönnuðurinn frekar en þau hjá Móðurfélaginu/Dægurflugunni. 

„Leiðréttu mig endilega ef það er ekki svo,“ skrifar Valgeir.

Særandi og sýni lítilsvirðingu

Vísir reyndi að ná tali af Jóni Ólafssyni en án árangurs. Valgeir nefnir í bréfinu nokkur atriði sem honum þykir hreinlega lítilsvirðing við sig og einnig Sigurð Bjólu en til stóð að hafa þá meðal áhorfenda. Ekki er ofsagt að segja að þeir tveir hafi myndað kjarnann í hinu fornfræga Spilverki Þjóðanna en Egill Ólafsson hætti um miðbik ferils hljómsveitarinnar til að stofna Hinn íslenska Þursaflokk.

„Það að fá Diddú í flutning laga okkar og þá son Egils en líta fram hjá mér ( ég get ekki talað fyrir hönd Sigurðar Bjólu ), er særandi og að margra mati ef ekki flestra sýnir það lítilsvirðingu í minn garð.“

Valgeir segir að væru flytjendur allir úr öðrum áttum myndi málið horfa öðruvísi við. 

„Þá hefði samt verið eðlileg og kurteis framkoma að ræða við höfunda um þennan stóra viðburð og reifa hugmyndir um hann.“

Tónleikar sem eigi ekkert skilt við heiður

Valgeir segist ekki hafa heyrt í Jóni síðan í ágúst. Hann nefnir í bréfi sínu að tveir af meðlimum Spilverksins eigi sem sagt fulltrúa í flutningi laga á þessum tónleikum. 

„Á meðan flutnings er ekki óskað af hinum tveimur meðlimunum, að minnsta kosti hef ég ekki verið beðinn.“

Valgeir segir að honum þyki það leitt en hann vilji afþakka boðið á tónleikana, þeir eigi ekkert skilið við heiður heldur væri lítilsvirðing réttara orð.

Bó og Bubbi hneykslaðir

Í samtali við þau Valgeir og Ástu kemur fram að stirt hafi nú verið um hríð milli Valgeirs og Jóns sem hefur verið einn helsti aðdáandi Spilverksins. En hann sé sannarlega ekki einn um það og hann sé ekki að gera Valgeiri neinn greiða með því að leika tónlist hans.

Og ekki skortir að kollegar Valgeirs úr stéttinni séu hneykslaðir á þessari framgöngu Jóns og þeirra sem standa að tónleikunum.

„Orðlaus svo ekki sé meira sagt,“ segir Björgvin Halldórsson.

„Mikið er þetta lítilmannlegt,“ segir Bubbi Morthens.

„Ég bara skil þetta ekki!! Mér finnst ykkur vera sýnd mjög mikil vanvirðing með þessu. Þið eigið svo sannarlega betra skilið,“ segir Heimir Karlsson fjölmiðlamaður.

Valdimar Örn Flygenring leikari og leiðsögumaður er hugsi.

„Þetta er nú meira bullið. Er þetta ekki ykkar efni? Hvernig er hægt að gera þetta án ykkar samþykkis og aðkomu á ehv hátt? Héldu þeir að þið væruð dauðir. Eins og allt sem gerðist fyrir 1990,“ segir Valdimar Flygenring.

„Þetta er svo fáránlegt að það tekur engu tali! Hvílíkt rugl! Hrein lítilsvirðing!“ segir Vala Matt sjónvarpskona.

Ekki eintóm hneykslun

Þó eru aðrir samfélagsrýnar sem sjá málið í öðru ljósi.

„Æi leiðinlegt. Er samt ekki bara kominn tími til að njóta dásemdanna í höndum annarra? Jú Diddú og sviðslistamaðurinn Ólafur - verkin ykkar fá nýtt líf 2024, standa sjálf samt alltaf fyrir sínu, sannarlega eitthvað til að vera stoltur af,“ segir Helgi Gunnlaugsson afbrotafræðingur.

„Slakaðu á Valgeir! Þú ert nú, ásamt Agli, Bjólu o.fl. „a grand old man“. Slíkir móðgast ekki. Það er óþarfi. Þeir eru „aðal“ og ekkert skyggir þar á,“ segir Már Viðar Másson sálfræðingur.

Færslu Valgeirs í heild má sjá að neðan.