Það gekk upp og ofan en oddvitarnir voru þó allir sammála um að of langt hafi verið gengið í aðgerðum ríkisstjórnarinnar á Covid-tímum.
Í dag er mánuður til alþingiskosninga og að þessu sinni fékk Elín Margrét Böðvarsdóttir fréttamaður til sín formenn flokka af hægri væng stjórnmálanna, til að spá í spilin. Þetta eru þau Bjarni Benediksson, formaður Sjálfstæðisflokksins, Arnar Þór Jónsson, formaður hins nýstofnaða Lýðræðisflokks, Sigmundur Davíð Gunnlaugsson, formaður Miðflokksins, og Þorgerður Katrín Gunnarsdóttir, formaður Viðreisnar.
Í raun gekk illa framan af að fá þau til að staðsetja sig á hinu flokkspólitíska litrófi. Þorgerður Katrín sagðist til að mynda telja sinn flokk Viðreisn frjálslyndan sem hægt væri að staðsetja á miðjunni. Hún hins vegar horfði á þá þrjá herramenn sem voru henni til hægri handar og sagðist bara sjá íhaldssemina holdi klædda blasa við sér: Stöðnun meðan ákall væri um breytingar. Fólk vildi stjórnmálamenn sem tækju til hendinni.
Hún gekk þó heldur langt, að mati viðstaddra þegar hún vildi líkja þeim við Trump, við hávær mótmæli Bjarna, Sigmundar Davíðs og Arnars Þórs.
Ekki gengið of skammt
Umræðurnar voru sem sagt afar fjörlegar. Um eitt gátu þau þó verið sammála en það var þegar þau voru spurð um aðgerðir stjórnvalda í tengslum við Covid-faraldurinn, hvað þeim sýndist um þær?
Bjarni var fyrstur til svars og sagðist hafa komist að þeirri niðurstöðu, þegar hann legði þetta niður fyrir sig, eftir á að hyggja, að heldur langt hefði verið gengið.
„Ég get ekki komist að þeirri niðurstöðu að það hafi verið gengið of skammt,“ sagði Bjarni og taldi þurfa að koma til uppgjörs á þeim tíma. Það skipti máli meðal annars vegna þess að nú hafi komið fram frumvarp um ný sóttvarnarlög. Áður en slíkt verði fært í lög þurfi dýpri greiningu á þeim aðgerðum sem gripið var til.
Bjarna þótti það athyglisvert að teknu tilliti til þess að tveir þriðju þríeykisins svokallaða, væru komnir í framboð.
Valdasjúkir í framboði fyrir stjórnlyndan flokk
Sigmundur Davíð var þessu sammála. Hann sagði ýmis mistök hafi verið gerð og mikilvægt væri að fara vandlega yfir það hvað mætti læra af þessu.
Arnar Þór hafði mikið og margt um þetta atriði að segja. Hann setti á mikla ræðu, sagðist hafa gagnrýnt þessar hörðu aðgerðir sem væri einhver ljótasti blettur á lýðveldissögunni.
„Ríkisstjórnin afhenti þríeykinu völdin og þar sátu tveir valdfíknir einstaklingar sem nú eru komnir í framboð fyrir stjórnlyndasta flokk landsins,“ sagði Arnar Þór.
Hann var þar að tala um Víði Reynisson og Ölmu Möller sem eru í framboði fyrir Samfylkinguna.
Hann var ekki hættur; sagði einnig að það yrði að fara yfir það gerræði sem þá ríkti, þingið hafi brugðist og við yrðum að læra af þessu.
Þegar vísindin breyttust í trúarbrögð
Arnar Þór vildi helst ekki sleppa orðinu, hann sagði fjölmiðla hafa brugðist því þeir hafi gerst málpípur stjórnvalda og vísindamenn hefðu brugðist því vísindi geti ekki verið trúarbrögð en hafi orðið að þeim á þessum tímum.
Þorgerður Katrín sagði að gengið hafi verið of langt en sagði þó engan sóma af því að gagnrýna fólk harðlega sem ekki gæti svarað fyrir sig. Þeim umræddum finnist örugglega rétt að farið verði yfir aðgerðirnar svo hægt væri að forðast mistök.
Þorgerður Katrín bætti því við að henni þætti leitt að þetta kæmi upp við lok þáttarins, en afleiðingar Covid væru víðtæk og það hefði haft afleiðingar fyrir andlega líðan fólks, þá ekki síst barna og ungmenna.
„Meira kvíðin, segja rannsóknir,“ sagði Þorgerður Katrín sem taldi okkur geta gert svo miklu meira en gert hefur verið þegar andleg heilsa ungmenna er annars vegar.
Eins og áður sagði voru umræðurnar afar fjörlegar og víst er að kosningabaráttan er hafin með öllum þeim væringum sem henni fylgja. Pallborðið má sjá í heild sinni hér neðar.
