Víkingur Heiðar til­nefndur til Grammy-verðlauna

Víkingur er tilnefndur í flokki klassískra einleikshljóðfæraleikara. 

„Ég var bara að sjá þetta. Þetta var tilkynnt fyrir tuttugu mínútum,“ segir Víkingur Heiðar í samtali við fréttastofu. Eins og gefur að skilja eru listamenn um allan heim sem hafa fengið tíðindi af tilnefningum. Fastagestir á Grammy á borð við poppstjörnurnar Beyoncé og Taylor Swift og svo helstu stjörnur heimsins í djassi, rappi, rokki, kántrí og þar fram eftir götunum. Og svo klassíska deildin þar sem Ísland á sinn fulltrúa.

Víkingur keppir við bandaríska slagverksleikarann Andy Akiho, Curtis J Stewart, James Blachly & Experiential Orchestra, Mak Grgić & Ensemble Dissonance og Seth Parker Woods. Víkingur er hóflega bjartsýnn og með báða fætur á jörðinni. Verðlaunin verða veitt þann 2. febrúar.

„Ég hef verið svo heppinn að vinna fullt af verðlaunum. En ég hef líka ekki unnið fullt af verðlaunum,“ segir Víkingur Heiðar sem hefur verið meðal tilnefndu á þónokkrum verðlaunahátíðum en farið tómhentur heim. Þar á meðal þrisvar sinnum á vettvangi Tónlistarverðlauna Norðurlandaráðs.

Allar sigurræðurnar sem aldrei voru lesnar

„Ég hef alltaf mætt tilbúinn með sigurræðu í vasanum og svo þurft að fara heim og henda henni í ruslið,“ segir Víkingur Heiðar og hlær. Það sé vissulega skrýtin tilfinning að undirbúa sig ef svo færi að verðlaun féllu honum í skaut. Þannig verði hugsunin eins og maður sé búinn að vinna til verðlauna.

„Maður þakkar skrifar sigurræðu, þakkar mömmu sinni og pabba... og svo vinnur einhver annar,“ segir píanistinn og hlær. Hann nefnir að það væri fróðlegt að fá allar sigurræðurnar sem hafa verið skrifaðar í gegnum tíðina, en unnu ekki, upp á borðið.

„Það væri gaman sjá allar sigurræðurnar sem aldrei voru lesnar.“

En að öllu gamni sleppt hafi honum verið kennt snemma að líta á tilnefningar til verðlauna sem heiður og velta þeim ekki of mikið fyrir sér. Blaðamaður bendir honum á að líta mætti svo á, með einfaldasta hætti, að tuttugu prósent líkur væru á sigri.

„Auðvitað vona ég að það séu meiri en tuttugu prósent líkur en ég er líka í mínum eigin heimi. Hinum listamönnum finnst það svo kannski líka,“ segir Víkingur yfirvegaður.

Fimm stjörnu veisla

Víkingur lauk á miðvikudaginn tónleikaferðalagi með hinni kínversku Yuja Wang sem hófst í Hörpu 20. október. Þau hafa hlotið mikið lof meðal annars frá Jónasi Sen, rýni Vísis, sem skellti sér á aðra af tvennum tónleikum fyrir fullu húsi í Hörpu. 

Uppselt var á alla tíu tónleika þeirra Yuja og fengu tónleikarnir í Royal Festival Hall í London fimm stjörnur hjá gagnrýnanda Guardian. 

„Ég var í London á miðvikudagskvöld, kom svo heim í 24 tíma og er aftur kominn til Vínarborgar,“ segir Víkingur Heiðar.

Eftir annasamar síðustu vikur veltir blaðamaður fyrir sér hvernig heilsa píanistans er eftir alla þessa tónleika, öll þessi ferðalög.

„Það er mesta furða. Þegar maður er í svona prógrammi þá er eins og líkurnar minnki á því að maður verði veikur. En svo þegar törnin er búin eru stórauknar líkur á að maður fái flensu,“ segir Víkingur. Það er eins og eitthvað í undirmeðvitundinni taki völdin þegar mikið gangi á. Svo þegar verkefnunum sé lokið og listamaðurinn kominn heim til sín sé eitthvað sem gefi sig. Flensan mæti í heimsókn.

Stórkostlegasta verk sögunnar

Víkingur er tilnefndur fyrir flutning sinn á Goldberg-tilbrigðum Bach. Stærsta verkefni sem hann hefur ráðist í að eigin sögn.

„Goldberg er það stærsta sem ég hef gert á ævi minni,“ segir Víkingur Heiðar. Tölurnar tala sínu máli. 96 tónleikar allt frá Tókíó til Sydney og San Francisco. Fjölmargir tónleikar í Bandaríkjunum sem Víkingur telur að hafi líklega sitt að segja með tilnefninguna.

„Það var stórkostleg upplifun að fá að kynnast mínum áheyrendum úti um allan heim,“ segir Víkingur.

„Þetta er stórkostlegasta verk sögunnar í mínum bókum.“

Ætlar að taka sig á í uppvaskinu

Víkingur Heiðar er staddur í Vínarborg þar sem fram undan eru tónleikar annað kvöld með Fílhamóníusveit London. Hann spilar píanókonsert númer eitt eftir Brahms í Musikverein, fallegasta tónleikasal í heimi að mati Víkings.

„Það er engin salur sem líkist þessum,“ segir Víkingur Heiðar. Við taka fimm tónleikar á sex dögum í Þýskalandi og svo verður flogið til Íslands. Víkingur er spenntur fyrir tónleikunum fram undan en ekki síður tímanum með fjölskyldunni þar á eftir sem hann sér í hyllingum.

„Ég tæla að taka mér tveggja mánaða frí frá tónleikum. Minna syni mína á að þeir eigi pabba og konuna mína á að hún eigi mann. Taka mig á í uppvaskinu,“ segir Víkingur.