Jólin verða rauð í Manchester­borg

Tvö mörk undir lokin tryggðu Manchester United gríðarlega sætan sigur gegn nágrönnum sínum í Manchester City í ensku úrvalsdeildinni í dag. Lið City hefur aðeins unnið einn af síðustu sjö deildarleikjum sínum.

Fjörið hófst strax þegar liðsuppstillingarnar voru birtar fyrir leik en þá kom í ljós að hvorki Marcus Rashford né Alejandro Garnacho voru í leikmannahópi Manchester United. Ruben Amorim sagðist vega inn alla mögulega þætti þegar hann veldi leikmenn í leiki og að ákvörðunin að skilja þá félaga eftir hefði verið hans ákvörðun.

Þegar leikurinn sjálfur hófst var hins vegar lítið um fjör til að byrja með. Liðin spiluðu bæði varfærnislega og var lítið sem ekkert um opin færi. Manchester United átti ekki alvöru marktilraun allan fyrri hálfleikinn og heimamenn í Manchester City voru lítið skárri.

City nær forystunni

Á 36. mínútu tókst Josko Gvardiol hins vegar að koma City í 1-0 þegar hann skoraði með skalla eftir sendingu frá Kevin De Bruyne. Eilítill heppnisstimpill var yfir markinu því sending De Bruyne fór af varnarmanni og skrúfaðist yfir varnarmenn United og datt beint á kollinn á Gvardiol.

Strax eftir markið sauð upp úr á milli Kyle Walker og Rasmus Höjlund. Walker braut þá á Dananum sem var allt annað en sáttur og hljóp í átt að enska landsliðsmanninum. Þeir stungu saman nefjum í skamma stund áður en Walker henti sér í jörðina með miklum tilþrifum. 

Dómarinn Anthony Taylor gaf báðum leikmönnum gult spjald og er óhætt að segja að Walker hafi fengið holskeflu neikvæðra viðbragða yfir sig á samfélagsmiðlum fyrir leikaraskapinn sem hann sýndi.

Staðan í hálfleik var 1-0 og fyrstu mínútur síðari hálfleiksins voru álíka rólegar og megnið af fyrri hálfleik. Á 62. mínútu náði Manchester United loksins að ógna marki heimamanna þegar Ederson þurfti að hafa sig allan við að verja góðan skalla Amad Diallo.

Gestirnir í United léku betur í síðari hálfleiknum en þeim fyrri. Á 74. mínútu fékk Bruno Fernandes síðan dauðafærið sem beðið var eftir. Hann komst einn gegn Ederson eftir góða sendingu frá Höjlund en vippaði boltanum framhjá markinu.

Ótrúlegur viðsnúningur

Tíu mínútum síðar gerði Matheus Nunes leikmaður City sig hins vegar sekan um hræðileg mistök. Amad Diallo komst inn í sendingu hans til baka á Ederson, færið virtist vera að renna út í sandinn en þá kom Nunes á sprettinum til baka og braut klaufalega á Diallo og vítaspyrna dæmd. Bruno Fernandes skoraði örugglega úr vítaspyrnunni og staðan orðin 1-1.

Krísa Manchester City kristallaðist síðan tveimur mínútum síðar þegar Amad Diallo fékk sendingu innfyrir vörn City. Hann fór framhjá Ederson sem var í skógarferð og náði að koma boltanum í netið í gegnum klofið á Gvardiol sem náði ekki að hreinsa frá. Diallo kórónaði frábæran síðari hálfleik sinn en hann var besti maður United í leiknum.

Ótrúlegar senur og hola Manchester City og Pep Guardiola gerir ekkert nema dýpka. Lið City reyndi hvað það gat að skapa færi til að jafna metin en tókst ekki. 

Lokatölur 2-1 fyrir Manchester United sem lyftir sér upp í 12. sæti deildarinnar með sigrinum en Manchester City er áfram í 5. sæti og níu stigum á eftir toppliði Liverpool sem á leik til góða.