Erindrekar hanna fylgihluti úr æðardúni frá Skálanesi í Seyðisfirði.
Í fréttatilkynningu segir:
„Hið nýstofnaða Hakk gallerí þróar og heldur sýningar auk viðburða á verkum og verkefnum íslenskra jafnt sem erlendra hönnuða og listamanna.
Studio Erindrekar er íslenskt hönnunartríó með aðsetur í Reykjavík og á Seyðisfirði. Stúdíóið er skipað vöruhönnuðunum og æðarbændunum Írisi Indriðadóttur og Signýju Jónsdóttur og fatahönnuðinum og textílsérfræðingnum Sigmundi Páli Freysteinssyni.
Þeirra fyrstu vörur á markaði eru húfur og lúffur úr fyrsta flokks vottuðum æðardúni og vatns- og vindheldri, lífrænni, bómull sem eru handgerðar á Íslandi og seldar í takmörkuðu upplagi. Hönnunartríóið leggur áherslu á vistvæna hönnun og fylgir sjálfbærum vinnubrögðum í hverju smáatriði þar sem þau tína æðardúninn, vinna hann, hanna úr hönum vörur, framleiða og selja.
Þau notast við leikgleði, notagildi og nýstárlegar leiðir til að nýta efni og auðlindir til fulls og leitast við að skapa tímalausa og ábyrga hönnun. Erindrekar voru nýverið tilnefndir til Hönnunarverðlauna Íslands í flokki verks fyrir rannsókn þeirra og sýningu á fatnaði úr íslenskum æðardún.
Þau halda nú áfram vegferð sinni í að skapa vistvænar flíkur úr æðardúni þar sem staðbundin framleiðsla er þeirra megin hugðarefni en hér má nálgast nánari upplýsingar um þau.“
Á opnuninni var fullt hús gesta sem skálaði í bjór frá villibrugghúsinu Grugg og Makk. Hér má sjá vel valdar myndir frá opnuninni:
