Heimildin að ganga frá kaupum á Mann­lífi

Óhætt er að segja að um sé að ræða tvo gjörólíka miðla sem myndu þá heyra undir Sameinaða útgáfufélagið. Heimildin, sem varð til við sameiningu Kjarnans og Stundarinnar og kom út á prenti í fyrsta sinn í janúar síðastliðnum, hefur einblínt á „rannsóknarblaðamennsku til að veita almenningi aðgengi að óháðum upplýsingum“. Miðillinn kemur út á prenti og samnefndum vef.

Mannlíf hefur einblínt á útgáfu á netinu undanfarin ár þar sem áhersla hefur verið á slúður undir liðnum „Orðrómurinn“ auk þess að skrifa fréttir upp úr Facebook-færslum og dánartilkynningum meðfram einstaka bóka- og matarumfjöllun.

Eigandi Mannlífs tapar peningum

Þá er mikill munur á eignarhaldi miðlanna tveggja. Hátt í 40 hluthafar eru að sameinuðu útgáfufélagi Heimildarinnar. Enginn þeirra fer með meira en 8 prósenta hlut. Hjónin Ingibjörg og Jón Trausti eiga hvort um sig 7,6 prósent eins og Heiða B. Heiðarsdóttir, Jón Ingi Stefánsson og Snæbjörn Björnsson Birnir.

Sömu sögu er að segja um þá Reyni Traustason og Höskuld Höskuldsson sem eiga 7,6 prósent hvor. Þeir eru einmitt eigendur Mannlífs með 50 prósenta hlut hvor.

Rekstur félaganna gengur misjafnlega vel. Sameinaða útgáfufélagið sem gefur út Heimildina hagnaðist um 11 milljónir króna árið 2023 á meðan Sólartún sem gefur meðal annars út Mannlíf tapaði rúmlega þrjátíu milljónum króna í fyrra.

Meirihluti stjórnar spenntur

Ljóst er að yfirvofandi kaup eru á viðkvæmu stigi. 

„Það er eitthvað sem ég get ekkert sagt um,“ sagði Reynir Traustason, ritstjóri Mannlífs og helmingseigandi Sólartúns ehf. í samtali við Vísi um yfirvofandi kaup.

Jón Trausti Reynisson, framkvæmdastjóri Sameinaða útgáfufélagsins og hluthafi í félaginu, sagðist heldur ekki geta tjáð sig um málið. Hann vísaði á Elínu G. Ragnarsdóttur stjórnarformann félagsins.

Elín Guðrún staðfesti í samtali við fréttastofu að viðræður hefðu átt sér stað síðan í vor. Verið væri að skoða leiðir til að vera með auglýsingadrifinn miðil undir hatti Sameinaðs útgáfufélags.

„Meirihlutinn í stjórn telur að þetta sé leiðin,“ segir Elín. Stjórnin er skipuð fimm aðilum, þremur upphaflega tengdum Stundinni og tveimur tengdum Kjarnanum. 

Samkvæmt heimildum fréttastofu er óeining í stjórninni varðandi kaupin á Mannlífi. Elín, Heiða Björk Heiðarsdóttir og Snæbjörn Björnsson Birnir eru fylgjandi kaupum en Hjálmar Gíslason og Vilhjálmur Þorsteinsson alfarið á móti. 

Áratugur liðinn frá átökunum á DV

Elín stjórnarformaður áréttar að verði af kaupunum verði Reynir ekki ritstjóri Mannlífs. Þá verði Mannlíf í eigu Sameinaða útgáfufélagsins með gjörbreytta ritstjórnarstefnu frá því sem þekkist á miðlinum nú. 

Feðgarnir Jón Trausti og Reynir störfuðu lengi saman á DV og Ingibjörg Dögg sömuleiðis. Þau og félagar þeirra á DV stóðu í stórræðum fyrir áratug þegar Björn Leifsson í World Class fékk sig fullsaddan af fjölmiðlaumfjöllun miðilsins. 

Úr varð yfirtaka á félaginu sem hafði í för með sér ritstjóraskipti og töluverðar breytingar í liði fréttamanna. Svo fór að félagið sem rak DV var úrskurðað gjaldþrota árið 2018. 

Feðgarnir og Ingibjörg stofnuðu í framhaldinu Stundina.

Reynir hætti að skipta sér af Stundinni þremur árum síðar og sagði það ekki vera alveg sinn fjölmiðil þó um flott blað væri að ræða.

„Ég er poppaðri en svo,“ sagði Reynir.

Sameinaða útgáfufélagið gefur út Heimildina, Vísbendingu og fljótlega mun Mannlíf bætast í flóruna gangi kaupin eftir.

„Ég vona að þetta klárist fyrir áramót,“ segir Elín stjórnarformaður.

Uppfært klukkan 18:52 með upplýsingum frá Elínu stjórnarformanni Sameinaða útgáfufélagsins þess efnis að Reynis Traustason verði ekki áfram hjá Mannlífi verði af kaupunum.