Lengi getur vont versnað hjá Man. City

Aston Villa vann Manchester City í hádegisleiknum í ensku úrvalsdeildinni í dag og komst um leið upp fyrir Englandsmeistarana City í töflunni. Eymd Englandsmeistarann eykst bara með hverjum leiknum.

Aston Villa vann leikinn 2-1 eftir að hafa komist 1-0 yfir eftir sextán mínútur. City minnkaði muninn í uppbótatíma leiksins.

Villa er með 28 stig í fimmta sætinu en City situr í sjötta sæti með 27 stig.

Aston Villa maðurinn Morgan Rogers átti stórleik í leiknum, skoraði eitt mark, lagði upp annað og reyndist City vörninni mjög erfiður.

Manchester City hefur nú aðeins unnið einn af síðustu átta deildarleikjum sínum og það er jafnframt einu sigur liðsins í síðustu tólf leikjum í öllum keppnum. Sex af þessum átta deildarleikjum hafa tapast.Pep Guardiola virðist vera algjörlega ráðalaus þegar kemur að snúa gengi liðsins við.

Það tók líka Aston Villa aðeins átján sekúndur að komast í fyrsta dauðafærið eftir varnarmistök City og eftir rúma mínútu var Stefan Ortega búinn að bjarga tvisvar sinnum frábærlega í marki City.

Ortega kom þó ekki við neinum vörnum þegar Jhon Duran skoraði á 16. minútu. Morgan Rogers slapp þá í gegnum City vörnina eftir laglega stungusendingu Youri Tielemans en í stað þess að skjóta sjálfur þá lagði hann boltann til hliðar á Duran sem skoraði í tómt markið.

Manchester City var meira með boltann í fyrri hálfleik en Villa fékk færin.

Aston Villa liðið tók síðan yfir leikinn í seinni hálfleiknum og var búið að ógna nokkuð áður en Morgan Rogers kom liðinu í 2-0.

Mark Rogers kom á 65 mínútu. Hann byrjaði sóknina og skoraði síðan eftir stoðsendingu frá John McGinn.

Eftir það reyndi City að búa eitthvað til en voru nánast alveg bitlausir. Erling Haaland fékk varla boltann og Villa menn voru grimmari í flesta bolta.

Phil Foden náði að minnka muninn í uppbótatíma eftir að varnarmaður Aston Villa steig á boltann í teignum. Slysalegt mark en City fékk smá von. Þeim tókst þó ekki að jafna metin eða fá eitthvað út úr leiknum.