Enski boltinn

Frekar til í að borga himin­háa sekt en að kaupa Sancho

Runólfur Trausti Þórhallsson skrifar
Hefur ekki sýnt mikið í blárri treyju Chelsea.
Hefur ekki sýnt mikið í blárri treyju Chelsea. Visionhaus/Getty Images

Þegar Chelsea fékk enska vængmanninn Jadon Sancho lánaðan frá Manchester United síðasta sumar var það undir þeim formerkjum að Lundúnaliðið myndi kaupa leikmanninn að loknu yfirstandandi tímabili. Chelsea hefur nú skipt um skoðun og er tilbúið að borga sekt frekar en að festa kaup á leikmanninum.

Hinn 24 ára gamli Sancho gerði lítið sem ekkert í treyju Manchester United ef frá er talið mark í 2-1 sigri á Liverpool þann 22. ágúst árið 2022. Leikmaðurinn lenti upp á kant við Erik ten Hag, þáverandi þjálfara, og var lánaður til síns fyrrum félags Borussia Dortmund.

Dortmund taldi frammistöðu Sancho ekki nægilega góða til að kaupa leikmanninn á nýjan leik. Hann sneri aftur til Man United og var – þó svo að samband hans og Ten Hag hafi skánað – lánaður til Chelsea síðasta sumar. Í samningi félaganna var ákvæði um að Chelsea þyrfti að kaupa leikmanninn að lánssamningnum loknum.

Nú greinir The Independent frá því að Chelsea hafi engan áhuga á að kaupa leikmanninn og sé tilbúið að greiða sekt til að komast hjá því. Ekki væri um neina smásekt að ræða ef marka má heimildir The Independent. Þar segir að Chelsea þyrfti að borga fleiri milljónir punda til að komast hjá því að kaupa Sancho.

Samningur félaganna var á þá leið að ef Chelsea myndi lenda ofar en 14. sæti þá þyrfti það að kaupa Sancho fyrir 20-25 milljónir punda. Nú stefnir í að félagið muni borga stóran hluta þeirrar upphæðar til þess eins að leikmaðurinn yrði áfram í Manchester-borg.

Sancho hefur skorað tvö mörk og gefið sex stoðsendingar í 29 leikjum í öllum keppnum á leiktíðinni.




Fleiri fréttir

Sjá meira


×