Íþróttir

Liverpool er einhæft lið

Jose Mourinho, stjóri Chelsea, segir að þó Liverpool sé vissulega frábært varnarlið, sé það í raun það eina sem liðið geti og segir liðið mjög einhæft. "Liverpool verst vel, en það er líka það eina sem þetta lið getur. Það er mjög erfitt að spila á móti liði sem leikur eins og Liverpool og menn þurfa að nota höfuðið ef þeir ætla að vinna þá, það þýðir ekki að spila með hjartanu á móti þeim, því þá tapar þú."

Sport 6.1.2006 11:45

Á höttunum eftir Kelly

Úrvalsdeildarlið West Ham er sagt vera að undirbúa tilboð í írska bakvörðinn Stephen Kelly hjá Tottenham nú í janúar, en samningur hans við Tottenham rennur út í sumar. Talið er víst að Tomas Repka muni fara frá félaginu fljótlega og þá er ljóst að West Ham mun vanta varnarmann til að fylla skarð hans.

Sport 6.1.2006 11:40

Mikill karakter hjá KR

Leikmenn KR sýndu mikinn karakter með því að ná framlengingu og að lokum sigri gegn Fjölni á heimavelli sínum í Iceland-Express deildinni í gær eftir að hafa verið 14 stigum undir þegar 4. leikhluti var hálfnaður.

Sport 6.1.2006 11:00

Langt komið með að landa Evra

David Gill, yfirmaður Manchester United er nú staddur í Mónakó þar sem hann að sögn félagsins hefur að mestu gengið frá kaupum á franska landsliðsmanninum Patrice Evra. Leikmaður þessi er 24 ára gamall og vill ólmur fara frá Mónakó. Hann hefur verið orðaður mest við Manchester United og Inter á Ítalíu, en nú virðist sem enska liðið sé komið langt með að ganga frá kaupunum.

Sport 5.1.2006 20:13

Njarðvík og Grindavík töpuðu

Það urðu heldur betur óvænt úrslit í úrvalsdeild karla í kvöld þegar heil umferð var leikin. Efsta lið deildarinnar, Njarðvík, þurfti að sætta sig við tap í Borgarnesi gegn frísku liði Skallagríms 96-78. Þá lágu grannar þeirra í Grindavík mjög óvænt fyrir botnliði Hauka í Hafnarfirði, 98-82.

Sport 5.1.2006 21:04

Yfirburðir Chelsea endast ekki lengi

Gary Neville segir að þó vissulega líti út fyrir að Chelsea muni rúlla upp ensku úrvalsdeildinni í ár eins og í fyrra, muni yfirburðir liðsins ekki vara lengi og bendir á önnur lið sem hafi náð að verða meistarar en hrunið í kjölfarið.

Sport 5.1.2006 18:49

Andy Johnson er ekki til sölu

Forráðamenn Crystal Palace hafa enn eina ferðina séð ástæðu til að gefa út yfirlýsingu þess efnis að fyrrum landsliðsframherjinn Andy Johnson sé alls ekki til sölu. Johnson, sem fór á kostum með Palace í úrvalsdeildinni í fyrra þó liðið félli aftur í fyrstu deild, hefur verið mjög eftirsóttur af liðum í úrvalsdeildinni allar götur síðan Palace féll.

Sport 5.1.2006 19:09

Riera klár í slaginn

Manchester City hefur staðfest að spænski leikmaðurinn Albert Riera sé nú formlega genginn í raðir félagsins að láni frá Espanyol og verður hjá enska liðinu út leiktíðina. Riera gæti orðið klár í slaginn fyrir bikarleik City við Scounthorpe um helgina. Stuart Pearce, stjóri City, er mjög ánægður að vera loks búinn að landa leikmanninum, en hann hefur lengið verið aðdáandi hans.

Sport 5.1.2006 20:22

Mourinho og Ferguson sleppa vel

Enska knattspyrnusambandið hefur afráðið að refsa þeim Jose Mourinho og Alex Ferguson ekki fyrir ummæli sín í garð leikmanna og dómara í byrjun desember. Ferguson dró heilindi Rob Styles dómara í efa eftir leik við Everton, en Mourinho kallaði einn leikmanna Wigan svindlara. Þeim félögum verður þó gert að útskýra mál sitt fyrir sambandinu og hafa verið beðnir að gæta tungu sinnar í framtíðinni.

Sport 5.1.2006 18:38

Lampard verður aldrei seldur

Jose Mourinho, stjóri Chelsea, segir að miðjumaðurinn Frank Lampard verði aldrei seldur frá ensku meisturunum og segist efast um að hann vilji taka gylliboðum Barcelona og Real Madrid á Spáni, sem vitað er að hafa augastað á landsliðsmanninum enska.

Sport 5.1.2006 17:13

Leikur við Jamaica og Úrugvæ

Enska knattspyrnusambandið hefur staðfest að enska landsliðið í knattspyrnu muni leika æfingaleiki við Jamaica og Úrúgvæ í undirbúningi sínum fyrir HM í Þýskalandi í sumar. England leikur við Úrúgvæ á Anfield þann 1. mars í vor og mætir svo Jamaica þann 3. júní á nýja Wembley-leikvangnum, en það verður síðasti leikur liðsins áður en HM hefst.

Sport 5.1.2006 17:05

Á höttunum eftir Meite

Enska úrvalsdeildarliðið Newcastle er á höttunum eftir varnarmanninum Abdoulaye Meite hjá Marseille, en hann er landsliðsmaður frá Fílabeinsströndinni í Afríku. Vefur Sky Sports fullyrðir að Newcastle sé í viðræðum við franska félagið um að fá hann til reynslu á næstunni og hafi kaup í huga, en þó gæti hugsanleg þáttaka hans í Evrópukeppninni orðið til að tefja nokkuð fyrir í viðræðunum.

Sport 5.1.2006 16:57

Hafa áhuga á Marek Suchy

Forráðamenn Tottenham eru nú í viðræðum við Slavia Prag með það fyrir augum að fá hinn unga miðjumann Marek Suchy til liðs við sig. Suchy þessi er aðeins 17 ára gamall og hefur vakið hrifningu útsendara enska liðsins, sem reyna nú að fá hann til reynslu. Tottenham á gott samstarf við Slavia Prag og er einn leikmanna liðsins í láni hjá tékkneska liðinu sem stendur.

Sport 5.1.2006 16:47

De Villiers í forystu

Suður-Afríkumaðurinn Giniel de Villiers hefur náð forystu í Paris-Dakar rallinu eftir að eknar hafa verið 6 dagleiðir. Villiers hafnaði í þriðja sæti á sjöttu leiðinni og hefur því náð 22 sekúndna forskoti á félaga sinn Carlos Sainz hjá Volkswagen-liðinu. Thierry Magnaldi sigraði á 6. leiðinni, en er engu að síður ekki á meðal fimm efstu manna í heildarkeppninni.

Sport 5.1.2006 16:34

Heil umferð í kvöld

Sex leikir eru á dagskrá í Iceland Express-deild karla í körfubolta í kvöld. Skallagrímur tekur á móti toppliði Njarðvíkur, Hamar/Selfoss mætir Snæfelli, botnlið Hauka fær Grindvíkinga í heimsókn, Þór mætir Hetti, Keflavík tekur á móti ÍR og KR fær Fjölni í heimsókn. Allir leikirnir hefjast klukkan 19:15.

Sport 5.1.2006 16:30

Kaupin á Vidic komin í gegn

Manchester United hefur nú formlega gengið frá kaupum á serbneska varnarmanninum Nemanja Vidic frá Spartak Moskvu fyrir sjö milljónir punda. Vidic er 24 ára gamall landsliðsmaður og hefur nú fengið atvinnuleyfi á Englandi, en hann mun væntanlega koma til liðsins á morgun.

Sport 5.1.2006 15:42

Iverson vill vinna gull

Allen Iverson hefur lýst yfir áhuga sínum á að vera valinn í bandaríska landsliðið í körfubolta fyrir heimsmeistaramótið í ár og Ólympíuleikana árið 2008. Hann lýsti þessu yfir við Jerry Colangelo, framkvæmdastjóra liðsins á dögunum.

Sport 5.1.2006 14:53

Tæklingin verður skoðuð af aganefnd

Fulltrúar aganefndar enska knattspyrnusambandsins hafa nú sett sig í samband við Alan Wiley dómara og beðið hann um skýrslu vegna ljótrar tæklingar David Sommeil, leikmanns Manchester City, á bakvörðinn Lee hjá Tottenham í leik liðanna í gærkvöldi.

Sport 5.1.2006 14:36

Allardyce reiður

Sam Allardyce, stjóri Bolton, brást reiður við þegar hann var spurður út í þrálátan orðróm sem enn er kominn á kreik um að hann verði næsti stjóri Newcastle. Mikið hefur verið rætt um framtíð Graeme Souness í stjórastól Newcastle og vilja margir meina að hann verði rekinn fljótlega, þar sem gengi liðsins hefur verið langt undir væntingum.

Sport 5.1.2006 14:24

Alfreð látinn fara

Alfreð Gíslasyni hefur verið vikið úr starfi sem þjálfara úrvalsdeildarliðsins Magdeburg, þar sem hann hefur verið við störf síðan 1999. Alfreð hefur náð góðum árangri á þessum tíma með liðið, en gengi liðsins hefur þó verið upp og niður í vetur. Alfreð hefur þegar gert samning um að taka við liði Gummersbach árið 2007.

Sport 5.1.2006 14:10

Kominn til Birmingham

Sóknarmaðurinn Chris Sutton hefur gengið í raðir Birmingham í ensku úrvalsdeildinni á frjálsri sölu. Hann komst að niðurstöðu um að fá að fara eftir nokkrar viðræður við forráðamenn Glasgow Celtic og er því kominn á kunnuglegar slóðir á ný, því hann spilaði lengi á Englandi áður en hann fór til Skotlands. Hann skoraði 86 mörk í 199 leikjum fyrir Celtic á ferlinum.

Sport 5.1.2006 13:58

LeBron James með stórleik

LeBron James átti stjörnuleik þegar lið hans Cleveland Cavaliers bar sigurorð af Milwaukee Bucks í NBA deildinni í nótt 91-84. James skoraði 32 stig, þar af 17 í fjórða leikhluta, hirti 11 fráköst, gaf 11 stoðsendingar og stal 5 boltum. Liðið varð þó fyrir áfalli í leiknum, því Larry Hughes fingurbrotnaði og verður frá í 6-8 vikur. Michael Redd var atkvæðamestur hjá Milwaukee með 28 stig.

Sport 5.1.2006 04:18

Tottenham sigraði Manchester City

Tottenham styrkti stöðu sína í fjórða sæti ensku úrvalsdeildarinnar í kvöld þegar liðið vann góðan útisigur á Manchester City 2-0. Mido og Robbie Keane gerðu mörk Tottenham, sem var betri aðilinn í leiknum og vann sanngjarnan sigur.

Sport 4.1.2006 22:32

Heiðar Davíð og Ólöf María kylfingar ársins

Golfsamband Íslands útnefndi í dag Heiðar Davíð Bragason og Ólöfu Maríu Jónsdóttur kylfinga ársins 2005. Davíð varð Íslands- og stigameistari á árinu, en Ólöf varð sem kunnugt er fyrsti íslenski kylfingurinn til að tryggja sér þáttöku á evrópsku mótaröðinni á árinu og spilaði á 12 slíkum á síðasta ári.

Sport 4.1.2006 18:59

Olisadebe kominn til Portsmouth

Enska úrvalsdeildarliðið Portsmouth hefur náð samkomulagi við pólska landsliðsmanninn Emmanuel Olisadebe og mun hann verða með liðinu út leiktíðina. Þetta kemur nokkuð á óvart, því enska liðið hafði sent leikmanninn aftur til Pananthiakos á dögunum eftir að hafa verið með hann til reynslu í nokkra daga og talið var að ekkert yrði af viðskiptunum.

Sport 4.1.2006 18:47

Eftirsóttur í ensku úrvalsdeildinni

Umboðsmaður framherjans Chris Sutton hjá Glasgow Celtic segir að nokkur lið í ensku úrvalsdeildinni séu búin að hafa samband við sig varðandi kaup á leikmanninum. Samningur Sutton við Celtic rennur út í sumar og sagt er að Everton og Portsmouth séu á meðal þeirra liða sem eru í viðræðum um að fá hann til liðs við sig.

Sport 4.1.2006 18:42

Kromkamp kominn, Agger á leiðinni

Enska úrvalsdeildarliðið Liverpool hefur nú gengið frá samningi við hollenska bakvörðinn Jan Kromkamp frá Villareal, en liðið fékk hann í skiptum fyrir Josemi á dögunum. Þá er félagið við það að ganga frá samningi við danska landsliðsmanninn Daniel Agger, en það hefur þó enn ekki verið staðfest.

Sport 4.1.2006 18:52

Hættur fasistakveðjum

Ítalinn Paolo Di Canio hjá Lazio segist vera hættur fasistakveðjum sínum á knattspyrnuvellinum, en hann var á dögunum sektaður og settur í leikbann vegna þessa. "Ég hugsaði málið yfir jólin og hef ákveðið að setja hagsmuni Lazio framar mínum eigin," sagði Di Canio, en benti á að hann stæði þó fast á pólitískum skoðunum sínum engu að síður.

Sport 4.1.2006 18:17

Manchester City - Tottenham í kvöld

Einn leikur er á dagskrá í ensku úrvalsdeildinni í knattspyrnu í kvöld. Manchester City tekur á móti Tottenham á City of Manchester Stadium. City er sem stendur um miðja deild, en Tottenham situr nokkuð óvænt í fjórða sæti deildarinnar og getur minnkað forskot Liverpool í þriðja sætinu niður í eitt stig með sigri í kvöld.

Sport 4.1.2006 16:08

Heimir í landsliðið í stað Baldvins

Baldvin Þorsteinsson hefur þurft að draga sig út úr íslenska landsliðshópnum fyrir EM í Sviss síðar í mánuðinum vegna veikinda. Viggó Sigurðsson hefur í stað hans valið Heimir Örn Árnason, leikmann Fylkis.

Sport 4.1.2006 17:23