Stefán Logi Magnússon átti góðan leik er Lilleström vann 1-0 útisigur á Vålerenga í norsku úrvalsdeildinni í dag.
Þetta var fyrsti leikur Stefáns Loga með félaginu en hann er þar á lánssamningi frá KR. Hann þótti á vefmiðilinum Nettavisen vera maður leiksins en hann fékk átta í einkunn. Enginn fékk sjö en nokkrir sex.
Sigurmarkið skoraði Frode Kippe á 88. mínútu leiksins. Þetta var aðeins fimmti sigur Lilleström á leiktíðinni en liðið er nú í ellefta sæti deildarinnar. Liðið er þó aðeins þremur stigum frá fallsæti og sigurinn því afar mikilvægur.
Stefán Logi varði til að mynda frá sóknarmanni Vålerenga strax á upphafsmínútunum þegar hann var sloppinn inn fyrir vörn Lilleström.
„Hann bjargaði nokkrum sinnum vel í fyrri hálfleik og það var frábært að sjá hann spila í dag. Maður veit aldrei hvernig þetta getur farið þegar um leikmenn sem maður þekkir lítið er að ræða. En Stefán er stórefnilegur leikmaður,“ sagði Henning Berg, þjálfari Lilleström, eftir leikinn.
