Niðurstöður kosninga birtar á morgun

Nú er orðið ljóst að talningu atkvæða í stjórnlagaþingskosningunni mun ekki ljúka í dag. Samkvæmt tilkynningu frá Landkjörstjórn verður send út tilkynning á morgun um það hvenær er að vænta að talningu ljúki og úrslit verða birt.

Í tilkynningu frá Landskjörstjórn segir að um hádegið í dag hafi verið lokið við að skanna öll atkvæði og fara yfir fyrstu athuganir á vafaatkvæðum með fulltrúum landskjörstjórnar. Að þessari athugunni lokinni þurfi að fara öðru sinni yfir öll vafaatkvæði og ganga úr skugga um að meðferð þeirra hafi verið rétt.

Landskjörstjórn segir að vegna þess hversu hátt hlutfall vafaatkvæða er hafi þessi hluti talningarinnar dregist nokkuð. Fulltrúar landskjörstjórnar vinna áfram að þessu verkefni ásamt starfsmönnum Skyggnis og hins breska undirverktaka DRS. Fullljóst er nú orðið að talningunni getur ekki lokið í dag.