Hrikalega vond lykt af kröbbunum

Maður var handtekinn á Domodedovo flugvellinum í Moskvu, höfuðborg Rússlands, á dögunum en tollverðir fundu alveg hrikalega vonda lykt þegar maðurinn gekk framhjá þeim.

Við nánari skoðun kom í ljós að maðurinn var með 63 kíló af kröbbum í töskunni og ætlaði að freista þess að smygla þeim inn til landsins. Tollverðirnir sögðu að lyktin af kröbbunum hefði verið svo sterk að þeim hefði sviðið í augun auk þess voru krabbarnir farnir að rotna í tösku mannsins.

Maðurinn neitaði að hafa ætlað að borða kjötið af kröbbunum heldur ætlaði hann að eiga skeljarnar til minningar.