Byrja að sekta fyrir nagladekkjanotkun á mánudag

Lögreglan á höfuðborgarsvæðinu beinir þeim tilmælum til bíleigenda sem enn eru á nagladekkjum að gera þar bragarbót á. Minnt er á að nú ber að greiða 5 þúsund krónur í sekt fyrir hvert nagladekk og því betra að taka þau undan hið fyrsta.

Þeir sem ekki bregðast við eiga sekt yfir höfði sér því lögreglan mun fylgja málinu vel eftir frá og með mánudeginum 9. maí, að því er fram kemur í tilkynningu. Ökumenn eru því hvattir til að gera viðeigandi ráðstafanir.