Barnaníð í Eyjum: Maðurinn átti að sæta gæsluvarðhaldi

Bæjarstjórinn í Vestmanneyjum gerir alvarlegar athugasemdir við að maður sem nauðgaði dóttur sinni og er grunaður um brot gegn fleiri börnum hafi ekki verið úrskurðaður í gæsluvarðhald eftir að málið kom upp. Hann segir sýslumanninn á Selfossi hafa verið gerðan að blóraböggli í málinu. Ekki megi vanmeta aðstæður og hlut kerfisins í málum sem þessum. Bæjarstjórinn gagnrýnir aðferðafræði stjórnsýslunar að flytja ákvörðunartökuna ætíð frá fólki í héraði.

Maðurinn tók grófustu brotin upp á myndband en ekki var krafist gæsluvarðhalds yfir honum þegar málið kom upp fyrir um ári síðan, jafnvel þótt hald væri lagt á þúsundir mynda og annara sönnunargagna á heimili mannsins. Fyrir um viku síðan var maðurinn úrskurðaður í gæsluvarðhald til 22. júlí að kröfu sett ríkissaksóknara.

Elliði Vignisson, bæjarstjóri í Vestmannaeyjum, segir málið mannlegan harmleik í svarbréfi til íbúa í Eyjum sem Elliði lét Vísi hafa. „Á dómstólum og öðrum hvílir sú ábyrgð að læra af hverju og einu máli og reyna að haga málsmeðferðum þannig að hagsmuna fórnarlamba sé betur gætt en ég tel að verið hafi í þessu máli. Lögmaður barnsins hefur ma. bent á að hann hafi farið fram á gæsluvarðhald yfir gerandanum strax í nóvember á seinasta ári en af því hafi ekki orðið. Við það geri ég alvarlegar athugasemdir," segir bæjarstjórinn í bréfinu.

Sýslumaðurinn að vinna vinnuna sína

Með þessu segist Elliði ekki vera að taka undir gagnrýni á Ólaf Helga Kjartansson, sýslumann á Selfossi. Elliði telur að Ólafur Helgi hafi verið gerður að nokkrum blóraböggli í umfjöllun um málið. „Sýslumaðurinn á Selfossi er að vinna sína vinnu og eftir þeim römmum og starfsumhverfi sem honum eru settir af sínum yfirboðurum. Við Eyjamenn eins og margir aðrir á landsbyggðinni höfum marg ítrekað varað dómsmálaráðuneytið við því að málsmeðferð sé flutt í burtu frá þolendnum. "

Í hættu á að mæta kvalara sínum

Þá segir bæjarstjórinn að það liggi í augum uppi að hluti af vandanum í þessu máli sé að ákvarðantaka, svo sem um gæsluvarðhaldið, sé svo fjarri veruleika brotaþola.

„Ég er þess fullviss að sýslumaður hér í héraði, sem gengur um þessar sömu götur og hefur strax yfirgripsmikla þekkingu á forsendum, hefði ekki látið það viðganganst að barnugt fórnarlamb hafi í langan tíma mátt eiga það á hættu að mæta kvalra sínum hvar sem er og hvenær sem er. Og það löngu eftir að alvarleiki málsins er orðin kunnur þeim sem málið rannsökuðu. Hér er ekki hallað á sýslumannin á Selfossi heldur þá aðferðafræði stjórnsýslunar að flytja ákvörðunartökuna ætíð frá fólkinu inn á skrifstofur í Reykjavík eða í annað skjólgott umhverfi. Það bitnar nefnilega á þeim sem síst skyldi."

Sýslumaðurinn á Selfossi átti ekki að rannsaka málið

Elliði segir að sýslumaðurinn í Vestmannaeyjum hefði átt að rannsaka málið í stað sýslumannsins á Selfossi. Hann segir þó að minni embætti á landsbyggðinni geti þurft á aðstoð að halda í flóknum og erfiðum málum.

„Ég gagnrýni hinsvegar harðlega að ákvörðunartaka í málum sem þessu skuli ekki fara fram í nærumhvefinu og í þessu tilviki hefði hið eðlilega verið að sýslumaðurinn í Vestmannaeyjum hefði stýrt rannsókn og tekið ákvörðun um hvort beita ætti gæsluvarðhaldi eður ei, en ekki sýslumaðurinn á Selfossi og þá síður aðilar í Reykjavík. Alveg burt séð frá persónum og leikendum á hverjum stað, hverju sinni."