Sautján mótmælendur handteknir í St. Louis

Lögregla í Bandaríkjunum handtók að minnsta kosti sautján manns í borginni St. Louis um helgina sem tóku þátt í skipulögðum mótmælum vegna dráps lögreglu á táningnum Michael Brown í ágúst síðastliðnum. Nú standa yfir fjögurra daga mótmæli sem bera heitið „Ferguson-október“ eftir bænum Ferguson, nágrannabæ St. Louis í Missouri-ríki, þar sem hinn átján ára Brown var skotinn.

BBC greinir frá. Þúsundir manna hafa tekið þátt í ýmsum göngum og mótmælasetum en hinir handteknu höfðu komið saman fyrir framan bensínstöð og neitað að yfirgefa svæðið. Lögregla beitti piparúða við handtökuna, en að sögn Sam Dotson lögreglustjóra reyndu mótmælendurnir að brjótast inn í verslun stöðvarinnar og grýttu steinum í lögreglu.

Hvítur lögreglumaður skaut Brown, sem var dökkur á hörund, til bana úti á götu í Ferguson þann 9. ágúst. Brown var óvopnaður. Í kjölfarið hófust miklar óeirðir í bænum og kom fólk saman víðar í Bandaríkjunum til að mótmæla lögregluofbeldi og þeirri mismunun sem þeldökkir upplifa daglega víða í Bandaríkjunum.