Íslenski boltinn

Uppbótartíminn: Það verður úrslitaleikur um titilinn | Myndbönd

Veigar Páll Gunnarsson skoraði fallegt mark fyrir Stjörnuna í gær.
Veigar Páll Gunnarsson skoraði fallegt mark fyrir Stjörnuna í gær. vísir/andri marinó
Tuttugasta og fyrsta umferð Pepsi-deildar karla í knattspyrnu kláraðist í gær. Hverjir áttu góðan dag og hverjir áttu erfiðan dag? Hvað segir tölfræðin og hver var umræðan á Twitter? Vísir gerir hér upp umferðina á léttum nótum.

Það verður úrslitaleikur um Íslandsmeistaratitilinn í fjórða skiptið á síðustu 18 árum næsta laugardag þar sem FH og Stjarnan berjast um þann stóra. Bæði lið unnu örugga sigra í umferðinni og er FH með tveggja stiga forskot. Áfram er allt opið í Evrópubaráttunni þar sem Fylkismenn gera sig nú líklega. Fram er í vondum málum.

Umfjöllun og viðtöl úr öllum sex leikjum umferðarinnar:

Stjarnan - Fram

Valur - FH

Víkingur - KR

ÍBV - Keflavík

Þór - Breiðablik

Fylkir - Fjölnir

Steven Lennon og félagar fá Stjörnuna í heimsókn í úrslitaleik á laugardaginn.vísir/stefán
Góð umferð fyrir...

... Kristján Guðmundsson, þjálfara Keflavíkur

Keflvíkingar unnu fjórða leikinn sinn í Pepsi-deildinni 22. júní, en þann fimmta ekki fyrr en í Vestmannaeyjum í gær. Lærisveinar Kristjáns hafa gælt við fallið undanfarnar umferðir eftir hörmulegt gengi, en þeim tókst að vinna sigur á ÍBV og kveðja þar með falldrauginn. Keflvíkingar voru borubrattir eftir fyrstu þrjár umferðirnar eftir að innbyrða níu stig af níu mögulegum, en eftir það gerðist lítið. Þeir verða a.m.k. í Pepsi-deildinni að ári.

... Atla Guðnason, framherja FH

Afmælisbarnið fór gjörsamlega hamförum á Vodafone-vellinum þar sem hann afgreiddi Valsmenn nánast einn síns liðs. Reynir Leósson, sérfræðingur Pepsi-markanna, tók Atla sérstaklega fyrir og gaf honum tíu fyrir sína frammistöðu. Þrenna og stoðsending á 30 ára afmælisdaginn er ekki slæmt. Svo er hann allt í einu kominn í baráttu um gullskóinn fyrir lokaumferðina.

... Gjaldkera FH

Það hefur svo sem ekkert verið leiðinlegt að halda utan um bókhaldið hjá FH-ingum undanfarinn áratug með UEFA-evrurnar streymandi inn á hverju hausti. En nú fá menn vatn í munninn í Kaplakrika. Þar verður boðið upp á hreinan úrslitaleik um Íslandsmeistaratitilinn á laugardaginn. Búist er við fimm til sjö þúsund manns á völlinn og miðinn kostar 1.500 krónur. Takið bara upp reiknivélina.

Hafsteinn Briem reynir að halda í við Martin Rauschenberg, miðvörð Stjörnunnar.vísir/andri marinó
Erfið umferð fyrir ...

... Markverði í Garðabæ

Bæði Ingvar Jónsson, markvörður Stjörnunnar, og Denis Cardaclija, markvörður Fram, meiddust á höfði í leik liðanna á Samsung-vellinum í gær. Ingvar rölti sjálfur af velli, en Denis þurfti að bera út af. Varamarkvörður Stjörnunnar hefði svo kannski átt að fá á sig víti og rautt, en Hörður Fannar sem kom inn á fyrir Denis hélt nú hreinu.

... Guðmund Benediktsson, þjálfara Breiðabliks

Blikar voru allt í einu komnir í fínan Evrópuséns eftir stórsigur á Víkingum um síðustu helgi, en lærisveinar Gumma Ben tóku þann draum og kveiktu í honum á Þórsvelli með tapi fyrir föllnum Þórsurum, 2-0. Blikar voru arfadaprir í leiknum og enda nú aldrei ofar en sjöunda sæti. Það hefur verið erfitt fyrir Gumma að sjá svona andlausa frammistöðu miðað við það sem var í húfi.

... Framara

Þriðja leikinn í röð voru Framarar búnir að kasta leiknum frá sér eftir tæplega hálftíma með ævintýra lélegri vörn og í heildina skelfilegri frammistöðu í fyrri hálfleik. Stjarnan var 3-0 yfir í hálfleik, en hefði hæglega getað skorað fimm til sex mörk. Framarar rifu sig í gang í síðari í hálfleik en það var alltof lítið og alltof seint. Fái Fjölnismenn eitt stig á móti ÍBV í lokaumferðinni eru Framarar fallnir, sama þó þeir vinni Fylki í Dalnum. Útlitið er svart í Safamýri.

Albert Brynjar Ingason skoraði á móti Fjölni og hélt Evrópudraumum Fylkis á lífi.vísir/pjetur
Tölfræðin:

*Atli Guðnason hefur skorað 6 mörk í 5 leikjum eftir að Heimir Guðjónsson setti hann á bekkinn í tveimur leikjum í röð í lok ágúst.

*FH-ingar hafa skorað 9 mörkum meira í seinni umferð Pepsi-deildarinnar (27) en í þeirri fyrri (18) en þeir eiga samt enn einn leik eftir.

*2 af 3 mörkum Grétars Sigfinns Sigurðarsonar í Pepsi-deildinni í sumar hafa tryggt KR-liðinu sigur. Grétar skoraði sigurmarkið á móti Víkingi í gær og á móti Fylki í júní.

*Fylkismaðurinn Andrew Sousa varð þriðji leikmaðurinn til þess að skora tvö mörk beint úr aukaspyrnu í Pepsi-deildinni í sumar en hinir eru Guðjón Pétur Lýðsson úr Breiðabliki og Pablo Punyed úr Stjörnunni.

*Stjörnuliðið hefur haldið marki sínu hreinu í fjórum leikjum í röð en liðið hélt aðeins þrisvar hreinu í fyrstu 17 deildarleikjum tímabilsins.

*Stjörnumaðurinn Rolf Toft skoraði sín fyrstu deildarmörk á Samsung-vellinum á móti Fram en þrjú fyrstu Pepsi-deildarmörkin hans komu á útivelli.

*Blikar náðu aðeins að vinna 1 af 11 útileikjum sínum í Pepsi-deildinni í sumar en aðeins Þórsliðið (0) er með færri sigra á útivelli þegar ein umferð er eftir.

*Fylkismenn eru búnir að vinna 5 af síðustu 8 leikjum sínum og hafa aðeins tapað einum deildarleik í ágúst og september.

*Þórsarar enduðu átta leikja taphrinu, unnu sinn fyrsta sigur síðan 10. júlí og skoruðu sitt fyrsta mark í 414 mínútur í 2-0 sigrinum á Blikum.

*Keflvíkingar eru búnir að vinna fleiri sigra á útivelli (3) en á heimavelli (2) í Pepsi-deildinni í sumar.

*Framarar eru búnir að fá á sig þrjú mörk eða fleiri í þremur leikjum í röð og alls í samtals átta leikjum í Pepsi-deildinni í sumar.

*Víkingar hafa aðeins náð í 1 stig af 15 mögulegum í síðustu fimm heimaleikjum liðsins í Pepsi-deildinni en allir fjórir leikirnir sem hafa tapast í Víkinni frá því um miðjan ágúst hafa tapast með einu marki.

Pétur Viðarsson spilaði vel í vörn FH.vísir/stefán
Skemmtilegir punktar úr Boltavaktinni:

Ólafur Haukur Tómasson á Þórvelli:

„Það er ekki fjölmennt í umdeildustu stúku landsins.“

Guðmundur Marinó Ingvarsson á Samsung-velli:

„Stjarnan er núna átta mörkum á eftir FH í markatölu. Stjarnan gæti náð FH þar eins og þessi leikur er að spilast.“

Eiríkur Stefán Ásgeirsson á Víkingsvelli:

„Bóas, sem er brjálaður stuðningsmaður KR, er mættur á völlinn og byrjaður að hvetja sína menn áfram. Óbilandi stuðningur í verki.“

Hæstu og lægstu einkunnir umferðarinnar:

Atli Guðnason, FH - 10

Pétur Viðarsson, FH - 8

Steven Lennon, FH - 8

Kristinn Þór Rósbergsson, Þór - 8

Albert Brynjar Ingason, Fylki - 8

Haraldur Freyr Guðmundsson, Keflavík - 8

Rolft Toft, Stjörnunni - 8

Gunnar Gunnarsson, Val - 2

Jóhannes Karl Guðjónsson, Fram - 3

Ingiberg Ólafur Jónsson, Fram - 3

Viktor Bjarki Arnarsson, Fram - 3

Aron Bjarnason, Fram - 3

Umræðan #Pepsi365

Flottasta mark umferðarinnar: Atvik umferðarinnar: Markasyrpan:
Pepsi Max-deild karla

Tengdar fréttir

Mest lesið


Fleiri fréttir

Sjá meira


×

Mest lesið