Kjarabarátta lögreglumanna: Enginn sinnti í umferðareftirliti í tvo tíma

Allir lögreglumenn á Íslandi voru inni á öllum lögreglustöðvum landsins milli klukkan 14 og 16 í dag þar sem þeir unnu að frágangi mála og við skýrslugerð.

Á tímabilinu var því enginn í eftirliti og ekki verið að stöðva fólk í umferðinni.  Lögregla sinnti þó brýnum útköllum og beiðnum um aðstoð frá borgurum.

Lögreglumenn hafa verið samningslausir í 141 dag og sýndu samstöðu í verki með aðgerðinni. Lögreglumenn senda samninganefnd ríkisins kveðju og óskir um að farið verði að fullri alvöru í samningaviðræður við Landssamband lögreglumanna, SFR og SLFÍ í næstu viku.

Krefjast lögreglumenn að laun þeirra verði leiðrétt til samræmis við skyldur þeirra og mikilvægi starfsins. Þá vilja þeir einnig fá aftur verkfallsréttindi.

Fréttastofu bárust myndir frá nokkrum lögreglustöðvum á landinu þar sem bílum var lagt fyrir utan á því tímabili sem lögreglumenn unnu að frágangi mála og við skýrslugerð.