Minnisvarði um fórnarlömbin í MH17 vígður

Minnisvarði um Ástralina sem létust þegar farþegaþotunni MH17 var grandað í Austur-Úkraínu fyrir ári síðan var vígður í Canberra, höfuðborg Ástralíu í dag. Fest voru á minnisvarðann nöfn allra þeirra þrjátíu og níu Ástrala sem létust þegar vélin fórst.

Haldin var minningarathöfn um fórnarlömbin í kjölfarið en í dag er eitt ár liðið frá því að vélin var skotin niður. 298 týndu lífi í árásinni en hún var á leið frá Amsterdam til Kuala Lumpur.

Greint var frá því í gær að í væntalegri skýrslu hollenskrar rannsóknarnefndar um flugvélina að flest bendi til þess að uppreisnarmenn hliðhollir Rússum hafi skotið vélina niður. Þá kemur fram í skýrslunni hvernig eldflaug var notuð og á hvaða braut hún var.