Leiðtogi Svíþjóðardemókrata snýr aftur

Jimmie Åkesson, leiðtogi Svíþjóðardemókrata, mun snúa aftur í embætti leiðtoga flokksins á föstudaginn. Åkesson fór í veikindaleyfi að loknum þingkosningum í september þar sem hann sagðist vera útbrunninn í starfi.

Að sögn heimildarmanna SVT mun Åkesson halda fréttamannafund á föstudag þar sem hann tilkynnir um endurkomuna.

Heimildarmaður Aftonbladet innan Svíþjóðardemókrata segir það rétt að hann muni snúa aftur en að ekki sé ljóst hvort hann muni sitja út kjörtímabilið og þá mögulega láta af embætti á landsfundi flokksins í nóvember.

Mattias Karlsson hefur gegnt leiðtogaembættinu í flokknum í fjarveru Åkessons.