Markaveisla hjá Arsenal á Emirates í kvöld

Arsenal vann 6-0 stórsigur á hvít-rússneska liðinu BATE Borisov í kvöld í lokaumferð riðlakeppni Evrópudeildarinnar.

Theo Walcott skoraði eitt mark í kvöld en átti líka þátt í fjórum öðrum mörkunum. Walcott var með fyrirliðabandið í leiknum og það kveikti heldur betur í honum.

Arsenal var fyrir leikinn búið að vinna riðilinn og tryggja sér sæti í 32 liða úrslitunum. Sigurinn í kvöld þýðir að liðið náði í 13 stig af 18 mögulegum og endaði með markatöluna 14-4.

Arsenal skoraði fyrsta markið eftir ellefu mínútur, var 3-0 yfir í hálfleik og komst í 4-0 í upphafi seinni hálfleiksins.

Mathieu Debuchy minnti á sig með sínu fyrsta marki í þrjú ár þegar hann kom Arsenal í 1-0 með þrumuskoti af átján metrum.

Theo Walcott átti þátt í undirbúningi fyrsta marksins og skoraði síðan annað markið sjálfur á 37. mínútu.

Jack Wilshere skoraði þriðja markið sex mínútum síðar eftir stoðsendingu frá Theo Walcott sem var allt í öllu í fyrri hálfleiknum.

Seinni hálfleikurinn byrjaði ekki vel fyrir BATE þegar Denis Polyakov sendi boltann í eigið mark á 51. mínútu eftir sendingu frá Theo Walcott. Danny Welbeck beið eftir boltanum en Polyakov sá um vinnuna fyrir hann.

Theo Walcott var felldur í teignum á 64. mínútu og Olivier Giroud skoraði úr vítaspyrnunni en þurfti reyndar að taka hans tvisvar sinnum.

Egyptinn Mohamed Elneny skoraði sjötta mark Arsenal á 74. mínútu eftir flottan undirbúning frá Jack Wilshere. Það var lokamark kvöldsins.