Afi sakaður um ítrekuð kynferðisbrot gegn barnabörnum

Héraðssaksóknari hefur ákært mann fyrir kynferðisbrot gegn þremur barnabörnum hans þegar þær voru 6 til 14 ára gamlar. Brotin eru sögð hafa átt sér stað í um áratug, frá 1997 til 2007 eða 2008.

Í ákæru yfir manninum segir að maðurinn hafi nýtt sér yfirburði sína gagnvart stúlkunum og traust þeirra og trúnað til hans sem afa þeirra.

Ein stúlkan bjó hjá manninum um tíma þegar stúlkan var sjö til átta ára. Í ákæru segir að maðurinn hafi snert kynfæri stúlkunnar, talað til hennar á ósiðlegan og kynferðislegan hátt og brotið á henni á annan kynferðislegan hátt án þess að hafa við hana samræði. Hafi maðurinn ýmist vakið stúlkuna þar sem hún lá sofandi í rúmi sínu til að brjóta gegn henni eða brotið gegn henni á daginn.

Í eitt skiptið er maðurinn sakaður um að hafa brotið gegn stúlkunni en þurft að hætta vegna þess að bróðir stúlkunnar kom í heimsókn. Hótaði hann henni þá að meiða bróður hennar ef hún segði frá. Hótaði hann stúlkunni einnig ítrekað að meiða mömmu hennar ef hún segði frá.

Maðurinn er sakaður um að hafa brotið gegn hinum stúlkunum tveimur í lengri tíma, svo til alla grunnskólagöngu þeirra. Sýndi hann þeim klámmyndbönd, fróaði sér fyrir framan þær og hafði við hana „önnur kynferðismök en samræði“.

Þá er hann sagður hafa í eitt skipti keyrt aðra stúkuna í sveit og sýnt henni getnaðarlimi á hestum, talað við hana um hversu stórir getnaðarlimir þeirra væru og sýnt henni hesta hafa samræði.

Tvær stúlknanna fara fram á miskabætur í málinu og krefjast þær báðar þriggja milljóna króna, auk þess að maðurinn greiði allan málskostnað.