„Vonandi vitum við á morgun, eða ekki seinna en þriðjudag, hvort við náum saman“

„Við getum sagt að alls staðar þokast eitthvað,“ segir Benedikt Jóhannesson, formaður Viðreisnar, um stjórnarmyndunarviðræður formanna Sjálfstæðisflokksins, Bjartar framtíðar og Viðreisnar.

Þeir hittust klukkan tíu í morgun en bundu enda á fundahöldin klukkan níu í kvöld og er því ellefu tíma törn lokið.

Benedikt vildi ekki gefa upp hvar var fundað en greint var frá því á Vísi fyrr í dag að formennirnir hefðu fundað í heimahúsi rétt fyrir utan höfuðborgarsvæðið.

Sjá einnig: Fundað fyrir utan höfuðborgarsvæðið

Þrír einstaklingar úr hverjum flokki, sem ýmist eru þingmenn eða aðstoðarmenn ásamt formönnum flokkanna, eru í málefnanefndum sem hófu undirbúning stjórnarsáttmálans í gær.

„Við hittumst hér og þar,“ segir Benedikt en spurður hvort formennirnir hafi ekki allir verið á sama stað meðan fundað var segir hann það hafa verið misjafnt. „Við erum líka að funda með okkar fólki inn á milli.“

Ljóst er að ágreiningur er á milli flokkanna er varðar málefni landbúnaðar, sjávarútvegs og þjóðaratkvæðagreiðslu um Evrópusambandið.

Benedikt segir í samtali við Vísi að flokkunum hafi miðað eitthvað áfram í flestum málum í dag.

„Vonandi vitum við á morgun, eða ekki seinna en þriðjudag, hvort við náum saman.“

Hann segir ekki búið að ákveða tíma fyrir fund á morgun. Hann á því von á því að hitta sitt fólk fyrst á morgun.